27 oktyabr 2011 16:54
Qurban Qurbanov: Bütün bunlar komandanı əldən salır
“Qarabağ”ın baş məşqçisi Qurban Qurbanov Premyer Liqanın 11-ci turunun “Bakı” ilə oyunu öncəsi azerisport.az saytının suallarını cavablayıb, “Neftçi”yə son məğlubiyyətdən (2:3) danışıb.
- “Neftçi”ylə oyundan sonra yetirmələrinizə nə dediniz?
- Uşaqları çox danlamağa ehtiyac duymadım. Qarşıda hələ “Bakı” ilə oyun var. Oyundan sonra sadəcə onu dedim ki, bu səhvlərə 11-ci turun oyunundan sonra qayıdacağıq.
- Komandada problem var?
- Xüsusi elə bir problem yoxdu. Hər şey qaydasındadı. Yorğunluq var və zədələr öz sözünü deyir. Şübhəsiz ki, məğlubiyyətdən sonra komandada əhval-ruhiyyə də yaxşı deyil. 2:0 öndə olduğun qarşılaşmada məğlub olandan sonra özünə gəlmək asan olmur.
- Bu məğlubiyyəti məşqçi karyeranızda ən acı yenilgi kimi qeyd etmək olar?
- Son dövrlərdə dünya futbolunda da belə hallara az rast gəlinmir. Bu, bir daha göstərir ki, 90 dəqiqə ərzində diqqətli oynamaq lazımdı. 3 xal itirməyimizə baxmayaraq, hər halda bundan nəticə çıxardıq.
- “Bakı” ilə oyun artıq Quzanlıda keçiriləcək...
- Doğma azarkeşlərimizin gözü qarşısında oynamaq bizim üçün üstünlükdü. Bu, əlavə motivasiyadı. Amma məlum çətinliklər də var. “Neftçi” ilə iki gün öncə oynamışdıq. Daha sonra Bakıdan Quzanlıya yol yorğunluğu. Bütün bunlar komandanı əldən salır. Amma azarkeşlərin xətrinə bunlara dəyər.
- Növbəti rəqibiniz son turda “Xəzər Lənkəran”la heç-heçə etdi...
- “Bakı” ilə həmişə bizə çətin olub. Artıq neçə oyundu uduzmurlar. Komanda nəticəyə oynamağı bacarır. Fərdi cəhətdən güclü futbolçuları da var.
- Parks son oyunda sabiq komandasına iki qol vurdu...
- Parks da, Verpakovski də güclü və təcrübəli futbolçulardı. Bizə diqqətli oynamaq lazımdı.
- Heyətdə dəyişikliklər olacaq?
- İstisna olunmur. Bu, komandaya lazımdı.
- Yeri gəlmişkən, “Neftçi”yə məğlubiyyətinizin əsas səbəbi kimi Roşanın Qara Qarayevlə əvəzlənməsi göstərilir...
- Əvəzetmələr hərdən özünü doğruldur, hərdən də yox. Məğlub olanda həmişə baş məşqçi günahkar çıxır. Bu görüşdə iki fərqli hiss oldu. Sadəcə, bir əvəzetmədə səhv axtаrmaq düz deyil. Qarşıda hələ çox oyun var.
