28 oktyabr 2011 00:12
“Qolu toy-bayram edən futbolçulardan deyiləm”
Peşəkar Futbol Liqasının Premyer Liqa klublarının baş məşqçiləri və kapitanları, həmçinin idman jurnalistləri arasında apardığı sorğunun nəticəsinə əsasən “Neftçi”nin yarımmüdafiəçisi Rəşad Abdullayevin sentyabr ayının ən yaxşı futbolçusu seçildiyini xəbər vermişdik. Azerisport.az xəbər verir ki, tədbirdə Rəşad Abdullayev media nümayəndələrinin suallarını cavablandırıb:
“Mənə göstərilən etimadı doğrultmağa çalışacağam. Mən hər oyuna çıxanda komandam üçün faydalı olmağa çalışıram. Milli komandaya da çağırılsam, canla-başla millinin şərəfini qorumağa hazıram. Bundan əvvəl Berti Foqts məni milliyə çağıranda zədəm tam sağalmamışdı və mən Foqtsa zədəmin tam sağalmadığını söyədim, o da məni başa düşdü. Ancaq yenidən milli komandaya çağırılsam, böyük məmnuniyyətlə oynayaram”.
“Hər komandanın özünün daxili nizam-intizam qaydası var. İntizamı pozan futbolçular isə cəzalandırılmalıdı. Elmar Baxşiyevin əvəzedici heyətə göndərilməsi nizam-intizam qaydaları baxımından edilmişdi. Bu da bizim komandada nizam-intizam qaydalarına ciddi əməl olunduğunu göstərir”.
“Uşaqlıqdan uzaqdan zərbələr vurmağa meyilliyəm. Məşqçilər də mənə deyir ki, zərbələrin güclüdü, uzaqdan zərbələr endir. Mən də uzaqdan dəqiq zərbələr endirməyə çalışıram və bunlardan da bəziləri qol olur. Hər oyunçunun bir özəlliyi var. Məndə də yəqin ki, bu, Allah vergisidi”.
“Qolu toy-bayram edən futbolçulardan deyiləm. Xasiyyətim belədi. Oyundan qabaq bəzi söz-söhbətlər eşidirəm. Bəzi qolları həmin insanlara özümü sübut etmək üçün vururam. Ona görə də vurduğum qolu sakit qeyd edirəm. İçimdən gələndə isə qolu sevinərək də qeyd edirəm”.
