Vaqif Cavadov baş məşqçisiz qala bilər

Futbol üzrə Azərbaycan yığmasından 1 illik uzaqlaşdırılan Vaqif Cavadovun çıxış etdiyi Rusiyanın "Volqa" klubunda baş məşqçi dəyişikliyi ola bilər. Azerisport.az xəbər verir ki, bu barədə Rusiya mətbuatı məlumat yayıb.

Məlumatda bildirilir ki, Nijni Novqorod təmsilçisinin baş məşqçi Dmitri Çerışev yaxın müddətdə istefaya göndərilə bilər. Buna səbəb isə sözügedən mütəxəssisin qarşısına qoyulan vəzifənin öhdəsindən gələ bilməməsidi.

 

Məsələ burasındadı ki, "Volqa" rəhbərliyi Çerışevin qarşısına şərt kimi bu mövsüm 30 turdan sonra 30 xalla turnir cədvəlinin 10-11-ci pillələrdə yer almaq hədəfini qoyubmuş Lakin adı çəkilən məşqçi buna nail olmayıb. Komanda hazırda 25 xalla 14-cü pillədə gedir.

 

Məhz buna görə də rəhbərlik Çerışevlə müqaviləni uzatmaq niyyətində deyil. Klub rəhbərliyi noyabrın 6-da "Volqa" ilə müqaviləsi başa çatacaq Çerışevi komandada saxlamağı düşünmür.

 

Məlum olduğu kimi, hazırda bu komandada maaşların gecikməsi ilə də bağlı gərgin vəziyyət yaranıb. Bu üzdən də noyabrın 15-də yığışacaq "Volqa"nın Direktorlar Şurası ilk öncə komandada yaranmış maliyyə məsələsini, daha sonra isə yeni baş məşqçinin namizədliyini müzakirə edəcək.

 

Qeyd edək ki, Cavadov məhz Çerışevin vaxtında "Volqa"ya transfer olub.