2 noyabr 2011 12:03
“Xal itkilərindən qaçmaq istəyirik”
“Qarabağ” Premyer Liqanın ikinci dövrəsinin ilk turunda “Sumqayıt Şəhər”lə qarşılaşacaq. Azerisport.az xəbər verir ki, ilk dövrədə debütantla oyunda xal itirən komanda bu dəfəki görüşə ciddi hazırlaşır.
Sonuncu oyunda “Bakı”nı məğlub edən komandanın heyətində cari mövsüm ilk dəfə Fərhad Vəliyev ilk “11-lik”də yer aldı. Həm bu səbəbdən, həm də sumqayıtlı olduğunu nəzərə alaraq klubun rəsmi saytı Fərhadın açıqlamasını yayıb. 31 yaşlı qolkiper oyun haqqında bunları deyib:
“İlk dövrədə “Sumqayıt Şəhər”lə oyunda gözlənilməz xallar itirdik. Oyunda çoxlu imkanlarımız olsa da, bundan yararlana bilmədik. İndi bizi yenə də ciddi oyun gözləyir. Sonuncu matçda AZAL-a qalib gəliblər. Əhval-ruhiyyələri yaxşıdı. Ən azından xal almağa çalışacaqlar. Amma biz də qələbə qazanmaq istəyirik. Xal itkilərindən qaçmaq istəyirik. Təbii ki, Sumqayıtda komandanın olması məni sevindirir. Bu, yerli uşaqları futbola həvəsləndirmək üçün vacib amildi. Xüsusilə, komandada çoxlu gənclərin olması sevindiricidi”.
“Son oyunda qapıda durmağıma gəlincə. Mən daim məşq edib öz şansımızı gözləyirdim. Tam səmimi deyirəm, Boyanla aramda sadəcə idman rəqabəti var. Bir-birimizi hər zaman dəstəkləyirik. Qurban müəllim kimə şans verirsə, o da ən yaxşısını etməyə çalışır. Pavloviçlə yanaşı daha bir gənc perspektivli Osman Umarov da var. Güclü rəqabətin olması bizim işimizin xeyrinədi. “Qarabağ” üçün ən yaxşısını etməyə çalışırıq. “Bakı”yla oyunda heç bir həyəcanım yox idi. Düzdü, istər-istəməz oyun praktikası öz sözünü deyir. Amma hər hansısa problem yaşanmadı. “Sumqayıt Şəhər`lə oyuna da əvvəlki qaydada hazırlaşırıq. Qapıda kimin dayanmasına Qurban müəllim qərar verəcək. Əsas odu ki, doğma azarkeşlərimiz qarşısında qələbə qazanaq”.
