2 noyabr 2011 12:45
Arriqo Sakki Bakıya gəlməyə razılıq verdi (FOTO)
"Bakı" futbol klubunun baş meneceri Zeynal Məmmədovun İtaliyaya işgüzar səfəri davam edir. Azerisport.az xəbər verir ki, klubun texniki sponsoru "Macron" idman geyimləri şirkətinin dəvəti ilə Appenin yarımadasına yollanan baş menecer və "Bakı" futbol klubunun baş katibi Zəka İbrahimov Italiya A liqasının həmin günlərə təsadüf edən “Bologna” – “Atalanta” (3:1) qarşılaşmasını izləyiblər.
Oyun zamanı əfsanəvi məşqçi Ariqo Sakki ilə söhbətləşmək imkanı əldə edən Zeynal Məmmədov "Bakı" futbol klubunun uşaq və yeniyetmə siyasəti, fəaliyyətə başlayan futbol akademiyası barədə ətraflı məlumat verib. Zeynal Məmmədov klubun idman infrastrukturu və aparılan işlərlə yaxından tanış olmaq məqsədi ilə təcrübəli mütəxəssisi Bakıya dəvət edib.
Xatırladaq ki, Ariqo Sakki hazırda İtaliya Futbol Federasiyasının uşaq futbolu üzrə baş koordinatoru vəzifəsində çalışır. Ariqo Sakki dəvəti məmnuniyyətlə qəbul edərək, uyğun bir zamanda Azərbaycana səfər edəcəyini bildirib.
