4 noyabr 2011 00:29
AFFA prezidenti: Gələn ildən qaliblər fərqli mükafatlandırılacaq
2010-2011-cu il mövsümü futbol üzrə Azərbaycan Premyer Liqası və birinci divizionunun qaliblərinin mükafatlandırılması mərasimində iştirak edən AFFA-nın prezidenti Rövnəq Abdullayev tədbirdə çıxış etdi. Azerisport.az xəbər verir ki, o, ötən mövsümlə və futbolumuzun hazırkı durumu ilə bağlı bunları dilə gətirib.
“Bütün qonaqları və Premyer Liqanın çempionunu, həmçinin digər qalib komandalarımızı salamlayıram. Ənənəvi olaraq qalibləri mükafatladırma mərasiminə yığışmışıq. Bir qədər gec də olsa tədbirimiz baş tutdu. Gələn ildən etibarən çempionatın qalibləri ya həmin gün, ya da çempionat başa çatdıqdan bir neçə gün sonra mükafatlandırılacaqlar.
Qeyd etmək istərdim ki, ötən çempionat yüksək səviyyədə keçdi. Bir çox praqnozlaşdırılmayan qarşılaşmalar oldu. Bu da yarışların yüksək səviyyədə təşkil olunmasından xəbər verir. “Neftçi”, “Xəzər Lənkəran” və “Qarabağ” komandalarını bir daha göstərdikləri əzimkarlıq münasibətilə təbrik edirəm. Maraqlı, gərgin mübarizə şəraitində keçən bir çempionatın şahidi olduq. Bütün klublara maraqlı çempionata görə təşəkkür edirəm.
Ölkəmizdə uşaq futboluna və ümumilikdə futbola diqqət, qayğı artmaqdadır. Bir sıra rayon mərkəzlərində uşaq stadionları tikilib istifadəyə verilib. Bu da gələcəkdə öz bəhrəsini verəcək. Uşaq futboluna göstərilən qayğı bizə deməyə imkan verir ki, futbolumuzun gələcəyinin parlaq olduğunu söyləyək. Bir daha bütün futbolçularımıza uğurlar və qələbələr arzulayıram. Bütün qalibləri təbrik edirəm”.
