5 noyabr 2011 18:00
Flavinyo: Tezliklə Azərbaycan pasportu daşıyacağıma inanıram
Xəbər verdiyimiz kimi, “Neftçi”nin yarımmüdafiəçisi, ötən ilin ən yaxşı futbolçusu seçilmiş Flavinyo Azərbaycan pasportu almaq niyyətindədir. Azerisport.az xəbər verir ki, o, bu barədə medalların təqdimetmə mərasimində AFFA prezidenti Rövnəq Abdullayevə də müraciət edib.
Azərbaycanda olduğu bir-neçə ildə bura öyrəşdiyini deyən futbolçu bu barədə açıqlama verib:
“Artıq bir-neçə ildir ki, Azərbaycandayam. Bura çox öyrəşmişəm. Azərbaycana gəlməklə futbol karyeramda yeni bir səhifə açıldı. Adət-ənənələrə, Bakıdakı ab-havaya öyrəşmək mənim üçün çətin olmadı. Burada futbola göstərilən diqqət və qayğı da urəyimcə oldu. Burada olduğum müddətdə dini, irqi ayrı seçkilik görmədim. Bu baxımdan Azərbaycan tolerant bir ölkədi. Bütün bunları nəzərə alaraq, medalları təqdimetmə mərasimində AFFA prezidenti Rövnəq Abdullayevə yaxınlaşaraq, Azərbaycan pasportu almaq niyyətimi ona bildirdim. AFFA prezidenti də öz növbəsində bunu müsbət qarşıladı və baş katib Elxan Məmmədova bununla bağlı göstərişlərini verdi. Klubumuzda legionerlərə, o cümlədən mənə Azərbaycan haqda kifayət qədər məlumat veriblər. Tezliklə Azərbaycan pasportu daşıyacağıma inanıram” - deyə Flavinyo bildirib.
