7 noyabr 2011 15:44
XL böyük oyunun hakimlərindən şikayət edəcək
Xəbər verdiyimiz kimi, “Xəzər Lənkəran” Premyer Liqanın 12-ci turunun “Neftçi” ilə oyununda Rəşad Abdullayevlə Şəhriyar Xəlilov arasında yaşanan epizodda rəqib futbolçunun cəzasız qalmasından narazı qalıb. Azerisport.az cənub klubunun həmin olayla bağlı yaydığı bəyanatı təqdim edir:
“Premyer Liqanın 12-ci turunda keçirilmiş "Neftçi" - "Xəzər Lənkəran" matçının 5-ci dəqiqəsində hakimin kobud səhvi ilə nəticələnən epizod baş verdi. Meydan sahiblərinin "27" nömrəli futbolçusu Rəşad Abdullayevlə "Xəzər Lənkəran"ın müdafiəçisi Şəhriyar Xəlilovun top uğrunda mübarizəsi zamanı "Neftçi" klubunun futbolçusu topu itirərək, heç bir səbəb olmadan gənc futbolçunun üzünə şillə endirdi. Bundan sonra hərəkətini ört-basdır etmək məqsədilə Abdullayev yerə uzanaraq ona qarşı kobudluq olduğunu nümayiş etdirdi.
Oyunun baş hakimi Elnur Muradov isə bu epizodda tamamilə yanlış qərar çıxararaq "Xəzər Lənkəran"ın qapısına doğru şübhəli cərimə zərbəsi təyin etdi, mübahisəsiz qırmızı vərəqə almalı olan Abdullayev isə ümumiyyətlə heç bir xəbərdarlıq belə almadı. Həmin cinahda olan yan hakimi də bu epizoda heç bir münasibət bildirmədi.
Təssüf ki, daim hakimlərin oyunu ədalətli şəkildə idarə etməsini istəsək də, bu cür kobud səhvlər əvvəllər olduğu kimi, yenə də təkrarlanmaqdadı. "Xəzər Lənkəran" Futbol Klubu bu epizodla bağlı müvafiq instansiyalara müraciət edəcək və intizamsızlıq nümayiş etdirən futbolçu və səriştəzilik nümayiş etdirən hakimlər briqadası barədə tədbirlər görünməsi üçün bütün vasitələrdən istifadə edəcək”.
