9 noyabr 2011 11:27
AFFA-nın baş katibi FİFA rəsmisini qəbul edib
FİFA U-17 qadınlararası dünya çempionatı Azərbaycan 2012 ilə bağlı FİFA-nın geniş tərkibli nümayəndə heyətinin ölkəmizdə səfərdə olduğu barədə xəbər vermişdik. Azerisport.az xəbər verir ki, bununla yanaşı, daha bir FİFA rəsmisinin – FİFA-nın Qadın Futbolunun İnkişafı üzrə meneceri Mayrilian Kruz-Blankonun Azərbaycana səfəri başlayıb.
Bu gün AFFA-nın inzibati binasında baş katib Elxan Məmmədovla Mayrilian Kruz-Blanko arasında görüş keçirilib. Azərbaycanda qadın futbolunun inkişafı ilə bağlı görülən işlər barədə FİFA rəsmisinə ətraflı məlumat verilib, FİFA U-17 qadınlararası dünya çempionatı Azərbaycan 2012-nin startına qalan müddət ərzində qadın futbolu ilə əlaqədar həyata keçiriləcək layihələr müzakirə olunub.
Xatırladaq ki, 2012-ci il sentyabrın 22-dən oktyabrın 13-dək FİFA U-17 qadınlararası dünya çempionatı Azərbaycanda keçiriləcək.
