11 noyabr 2011 18:54
Yarımcan SŞ yoldaşlıq oyunu keçirəcək
Futbol üzrə Azərbaycan Premyer Liqasının son turunda səfərdə “Qarabağ” üzərində qələbə qazanan (2:1) “Sumqayıt Şəhər” “Simurq”la oyunun hazırlığını Mehdi Hüseynzadə adına stadionda davam etdirir. Azerisport.az xəbər verir ki, komanda tam heyətlə məşq edə bilmir.
Belə ki, klubun əsas qapıçısı Andrey Popoviç əsas millinin, Emil Balayev, Bədavi Hüseynov, Ruslan Tağızadə, Emin Mustafayev, və Hacı Əhmədov isə U-21-in heyətində yer alır. Digər 3 futbolçu – Orxan Əliyev, Ruslan Nəsirli və Şamil Cəmaləddinov 17 yaşadək futbolçulardan ibarət yığmamızın heyətində sabah Almaniyalı həmyaşıdlarına qarşı çıxış edəcək.
“Sumqayıt Şəhər”in 6 futbolçusu – Abdulla Abatsıyev, Ramil Nuriyev, Rəşad Kərimov, Samir Abdulov, Ruslan Qurbanov və Sahil Kərimov da zədəli olduğu üçün komandanın məşqində iştirak etmir. Sevindirici hal kimi yalnız yarımmüdafiəçilər Orxan Həsənov və Eşqin Quliyevin zədəsini tam sağaldaraq hazırlığa başlamasını vurğulamaq olar. Qeyd edək ki, “Sumqayıt Şəhər” sabah saat 11:00-da Masazır qəsəbəsində yerləşən Əlincə stadionunda əvəzedicilərlə yoldaşlıq görüşündə üz-üzə gələcək.
