14 noyabr 2011 15:14
Tofiq Bəhramovun abidəsi Respublika stadionu önündən götürüldü
Məşhur azərbaycanlı futbol hakimi Tofiq Bəhramovun heykəli Respublika stadionunun qarşısından götürülüb. Azerisport.az xəbər verir ki, abidə stadionun inzibati binası önündə quraşdırılıb.
Bu yerdəyişmə arenada aparılan əsaslı təmir işləri çərçivəsində baş tutub. Artıq məşhur hakimimizin abidəsini uzaqdan görmək mümkün deyil. Arenanın direktoru Akif İsmayılov Lent.az-a açıqlamasında bildirib ki, abidənin götürülməsinə təmir işləri aparılan zaman qərar verilib. Belə dəyişiklik həm stadionun əsas girişinin qarşısını genişləndirmək, həm də abidənin inzibati bina qarşısında daha möhtəşəm görünüşünü təmin etmək məqsədilə edilib. Onun sözlərinə görə, heykəlin ətrafına mərmər döşənəcək, üstündə Bəhramovun doğum və dünyadan köçdüyü tarixlər də yazılacaq.
Qeyd edək ki, Tofiq Bəhramovun heykəlinin açılışı 2004-cü il oktyabrın 13-də dünya çempionatının seçmə qrup mərhələsi çərçivəsində keçirilmiş Azərbaycan – İngiltərə matçından öncə olub. Mərasimdə AFFA-nın sabiq prezidenti Ramiz Mirzəyev, FİFA prezidenti Yozef Blatter, hazırkı UEFA prezidenti Mişel Platini və İngiltərə Futbol Assosiasiyasının rəsmiləri də iştirak ediblər.
