“İnanırıq ki, AFFA humanist münasibəti Neftçiyə də göstərəcək”

"Neftçi"nin vitse-prezidenti Tahir Süleymanov AFFA-nın Apellyasiya və Ekspert Komitəsinin qərarına münasibət bildirib. Azerisport.az xəbər verir ki, o, klubun rəsmi saytına açıqlamasında bunları dilə gətirib:

 

"Bildiyiniz kimi, Premyer Liqanın 12-ci turu çərçivəsində keçirilmiş "Neftçi" - "Xəzər Lənkəran" oyununda futbolçumuz Rəşad Abdulayev rəqib oyunçuya qarşı etdiyi hərəkətə görə dərhal rəqibindən üzr istəmişdi. Sonradan isə Rəşad Abdullayev istər klub daxilində, istərsə də KİV-ə açıqlamalarında yaranmış vəziyyətə görə peşmanlığını dilə gətirmiş və belə halın bir daha təkrarlanmayacağını demişdi. Bunları nəzərə alaraq AFFA-nın İntizam Komitəsiniın futbolçumuza verdiyi 4 oyunluq cəzanın yüngülləşdirilməsi üçün AFFA-nın Apellyasiya və Ekspert Komitəsinə müraciət ünvanlamışdıq. Təəssüf ki, məsələyə sözü gedən qurumda baxılmış və qərar dəyişdirilməmişdir. Təcrübə göstərir ki, belə hallarda AFFA-nın Apellyasiya və Ekspert Komitəsi klublara öz humanist münasibətini əsirgəməmişdir. Misal üçün, Rəşadın hərəkətinin eynini "Bakı"nın hücümçusu Jaba və "Xəzər Lənkəran" klubunun qapıçısı Kamran Ağayev də etmiş, amma sonradan Apellyasiya və Ekspert Komitəsi onların cəzalarını yünülləşdirmişdi. Biz "Neftçi" PFK olaraq bir daha müraciət edəcəyik. Rəşad Abdulayevin səhvini başa düşməsi, ölkənin aparıcı futbolçularından olması və qeyd etdiyim kimi, digər klubların futbolçularına göstərilən humanist münasibət inanırıq ki, "Neftçi"yə də göstəriləcək".