15 noyabr 2011 00:05
Qarabağ 4 cavabsız qolla qələbə qazandı
Xəbər verdiyimiz kimi, millinin oyunlarıyla əlaqədar olaraq yaranmış fasilədən yararlanmaq məqsədilə, “Qarabağ” əvəzedici heyətlə hazırlıq maçı keçirib. Azerisport.az xəbər verir ki, 6 futbolçusu əsas millilərdə, 3 futbolçusu U-21-də olan Qurban Qurbanov eyni zamanda zədəli Rəşad Sadıqovun da xidmətindən yararlana bilmir. Ayağında bir qədər ağrı olan Maksim Medvedev də sadəcə qaçışla yadda qalıb.
Bu itkilərinin fonunda əvəzedicilərlə oyuna əsas komanda 11 nəfəri düzəltmək üçün 2-cilərdən Toğrul Bilallı və Təmkin Xəlilzadənin xidmətindən yararlanmalı olub. Komandanın qapıçıları Fərhad Vəliyev və Boyan Pavloviç hər 2 hissədə fərqli kollektivlərin qapısını qorudu.
Qurban Qurbanovun komandası meydana belə çıxıb: Fərhad Vəliyev, Zaur Həşimov, Kamil Hüseynov, Təmkin Xəlilzadə, İlqar Qurbanov, Namiq Yusifov, Nderim Nedzipi, Leonardo Roşa, Toğrul Bilallı, Georgi Adamiya, Bəxtiyar Soltanov.
Elçin Xudadatovun başçılıq etdiyi əvəzedici komanda isə görüşə bu heyətlə başlayıb: Boyan Pavloviç, Fərid Baxışov, Azər Həbibov, Eyvaz Mərdanov, Emin Əliyev, Rəcəb Mahmudov, Əliağa Xudiyev, Ülvi Rəfizadə, Elmin Əlizadə, Ayaz Mehdiyev, Kamil Xanıyev.
Görüş gözlənildiyi kimi, “böyüklər”in üstünlüyü ilə keçib. Görüşdə bütün qollar ilk yarıda vurulub. Bəxtiyar Soltanov ilk və son qolu vurub. Toğrul Bilallı və Nderim Nedzipinin fərqlənməsiylə oyun 4:0 başa çatıb.
