18 noyabr 2011 17:35
Araz Abdullayev: Renndə oynamağa hazıram
"Neftçi"nin yetirməsi Araz Abdullayev Fransanın "Rennes" klubunun maraq dairəsinə düşüb. Azerisport.az xəbər verir ki, hazırda müqavilə ilə İngiltərənin "Everton" klubuna məxsus olub, icarə əsasında "Neftçi"də oynayan istedadlı yarımmüdafiəçi bununla bağlı fikirlərini klubun rəsmi saytına açıqlayıb.
"Bildiyiniz kimi, işçi vizası probleminə görə İngiltərə Premyer Liqasında çıxış edə bilmirəm. Buna görə də icarə əsasında Avropanın digər klublarına keçidim mümkündür. Hər iki klub və menecerlər bunun üzərində çalışır. Avropanın "Renn" kimi güclü klubunun mənimlə maraqlanmasından məmnunam. Lakin hazırda zədəliyəm, müalicə olunuram. İnşallah, tezliklə sağalıb, "Rennes"in düşərgəsinə yollanmaq istərdim. Amma bu, "Neftçi" və "Everton" rəhbərliyinin razılığından sonra mümkün ola bilər. Hər bir halda "Rennes"də oynamağa hazıram" - deyə Araz Abdullayev bildirib.
Qeyd edək ki, Araz Abdullayev zədəsini tez bir zamanda sağaltsa, dekabrın 4-9-u aralığında Fransanın iddialı klublarından olan və hazırda Avropa Liqasında mübarizə aparan "Rennes"in düşərgəsində olmalıdı.
