19 noyabr 2011 14:50
Andrey Popoviç: Bu, hələ başlanğıcdı
“Sumqayıt Şəhər”in qapıçısı Andrey Popoviç Premyer Liqanın 13-cü turunun “Simurq”la oyunu öncəsi azerisport.az saytının suallarını cavablandırıb və millidəki debütündən danışıb.
- Bütövlükdə, bu ayı sizin üçün uğurlu hesab etmək olar: “Sumqayıt Şəhər”lə iki ardıcıl qələbəyə sevindiniz, yığmada debüt etdiniz...
- Hə, heç də pis deyil. Mən hətta deyərdim ki, il də mənim üçün uğurlu alınır. İlin əvvəlində ilk dəfə yığmaya çağırıldım. Sonra “Abşeron”la birinci divizionda çempion oldum. Daha sonra isə “Sumqayıt Şəhər”lə Premyer Liqada çıxış etmək şansı qazandım.
- Qarşıda “Simurq”la oyun var. İlk dövrədəki məğlubiyyətin qisasını almaq hissi var?
- Bizi revanşdan daha çox qələbə düşündürür. Fikrimcə, artıq “Sumqayıt Şəhər”in hamıya uduzduğu günlər arxada qaldı. İndi hər kəs çox ciddi köklənib. Artıq mövsümün əvvəlində buraxdığımız səhvləri təkrarlamaq istəmirik.
- Oyunçularınızın əksəri müxtəlif yığmalardan yeni qayıdıb. Yorğunluğun problem yaradacağını düşünmürsüz?
- Xeyr. Uşaqlar hamısı növbəti qələbə üçün kökləniblər. Bu yolda yorğunluğun problem yaradacağına inanmıram. Əlbəttə, yol istər-istəməz yorur. Amma uşaqların meydana yaxşı əhavl-ruhiyyədə çıxıb, “Simurq”u yenmək üçün əllərindən gələni edəcəklərinə inanıram.
- Yığmadakı təlim-məşq toplanışınızı necə qiymətləndirərdiz?
- Toplanış sadəcə əla alındı. Məşqlərdən çox razı qaldım.
- Nəhayət, yığmada debüt etdiniz. Albaniya ilə qarşılaşma barədə nə deyərdiz?
- Kamran Ağayev zədələnən gündən başa düşmüşdüm ki, çərçivəni mən qorumalı olacam. Bütövlükdə, debütümün uğurlu alındığını deyə bilərəm. Albaniya heç də zəif komanda deyil. Onları səfərdə yenmək çox yaxşı nəticədi. Komandamız çox yaxşı oynadı. Xüsusilə də birinci hissədə. İkinci hissədə isə daha çox arxaya çəkilib, müdafiə olunduq. Bu, hələ başlanğıcdı. Gələcəkdə də belə davam etmək istəyirəm. Düzdü, Albaniya ilə oyunda səhvlərim var idi. Amma uşaqlar məni dəstəkləyirdilər ki, özümə inanım.
- Yəqin ki, həyəcanlı idiniz...
- Bəli, əlbəttə, var idi. Hər halda ölkənin əsas yığmasının qapısını qorumaq, özü də ilk dəfə asan deyil.
- Albaniyanı yenib, ikinci Bundesliqa klubuna – “Union Berlin”ə uduzdunuz...
- Biz yaxşı oynadıq. Özü də Berti Foqts yeni futbolçuları sınaqdan keçirirdi. O oyunda bizim üçün əsas olan nəticə yox, ilk dəfə milliyə dəvət alan futbolçuları sınamaq idi.
- Vəli Qasımov deyir ki, uşaqlar sadəcə bu oyuna ciddi yanaşmadılar...
- Qeyri-ciddilik yox idi. Uşaqlar bu oyuna da normal yanaşdılar. Sadəcə, yeni futbolçular çox idi. Bu, istər-istəməz sözünü dedi. Bütövlükdə, heç də pis oynamadıq.
- Kamran Ağayev sağaldıqda, yenə böyük ehtimalla ehtiyatda qalacaqsız...
- Rəqabət heç kimə problem yaratmır. Bu, hamımızın xeyrinə olacaq.
