21 noyabr 2011 14:33
Ənənə davam edir: 10 ildən sonra və 5-ci dəfə
Premyer Liqanın 13-cü turunda səfərdə "İnter"lə qarşılaşan "Qarabağ" meydandan bir xalla ayrıldı. Azerisport.az klubun rəsmi saytına istinadən xəbər verir ki, bu görüş komandalar arasında 29-cu görüş olub.
Buna qədər keçirilən görüşlərdə 12 qələbə qazanıb, 9 dəfə məğlub olan "Qarabağ"ın "İnter"lə bu dəfəki dueli bir sıra məqamlarla yadda qalıb.
"İnter" - "Qarabağ" görüşündə qeydə alınan qolsuz bərabərlik 8-ci heç-heçə kimi tarixə düşüb. Matçda qol vurulmaması eyni zamanda 10 ildən sonra bir ilkin yaşanmasına səbəb olub.
Belə ki, "İnter" - "Qarabağ"ın oyununda tarixində ilk dəfə qol səsi çıxmayıb. Ümumiyyətlə, “İnter”in varisi olduğu “Xəzər Universiteti” ilə sonuncu dəfə 2000/2001 mövsümündə baş tutan oyununda qapılara yol tapılmamışdı.
2001-ci ilin martın 31-də Zabrat qəsəbə stadionundakı oyunla yanaşı, bir mövsüm öncə eyni ayda, eyni stadiondakı maçda da qol olmamışdı. Kubok matçlarını da hesaba almaqla baş tutan 35 oyunda cəmi 2 dəfə bu hal yaşanmışdısa, bir gün öncəki qarşılaşmada 3-cü oldu.
Oyunda qol vurulmasa da, “Qarabağ”ın “İnter”ə qarşı seriyası davam edir. Belə ki, komanda “bankirlər”ə qarşı məğlubiyyətsizlik seriyasını 5 oyuna çatdırdı. Düzdür, bakılılara qarşı 4 oyunluq qələbə seriyası qırıldı. Amma “Qarabağ” ardıcıl 5-ci matçda da qapısını toxunulmaz saxlaya bildi.
“İnter”lə oyunda qeydə alınan, eyni zamanda başqa ənənənin də davam etməsinin səbəbi olub. Belə ki, “Qarabağ” 2011-ci ildə 5-ci dəfə millinin toplanışdan sonra keçirdiyi ilk oyunda xal itkisi ilə qarşılaşdı. Bu 5 qarşılaşma - “Neftçi” (0:2), “Bakı” (0:0), “Sumqayıt Şəhər” (0:0), “Rəvan” (1:1), “İnter”lə (0:0) oyunlardır.
Maraqlıdır ki, milli toplanışından sonra “Qarabağ” 2011-də cəmi bir qələbə qazanıb ki, o da məhz “İnter”lə oyuna təsadüf edib. Ötən mövsüm Premyer Liqanın XXVIII turunda Adamiyanın 76-cı dəqiqəsində penaltidən vurduğu qolla qələbə qazanmışdı.
