21 noyabr 2011 16:29
“Qəbələnin futbolçusu məni təxribata çəkirdi”
"Neftçi"nin futbolçusu Slavço Georgievski "Qəbələ" ilə oyun haqda danışıb. Azerisport.az xəbər verir ki, makedoniyalı yarımmüdafiəçi klubun rəsmi saytına açıqlamasında flaqmanın məğlubiyyətə layiq olmadığını deyib.
"Qəbələ" ilə görüşdə üstünlük tamamilə bizim tərəfdə idi. Oyuna "Neftçi" nəzarət edirdi. Məğlubiyyətə layiq deyildik. "Qəbələ"nin futbolçuları vaxtı çox uzadırdı. Onlar tez-tez qəsdən yıxılır, oyunun vaxtını aparırdılar. Belə hərəkətlər böyük komandalara yaraşmır. Məsələn, biz "Qarabağ"la oyunda 3:2 hesabı ilə irəli keçdikdən sonra bu cür hərəkətlərlə vaxtı öldürmədik, əksinə, bundan sonra da hücumlar təşkil etdik. "Qəbələ" ilə görüşün hakimliyinə gəlincə, referi hələ oyunun əvvəllərində penalti zərbəsi təyin etməli idi. Çünki Bahodir Nasimov rəqib futbolçunu keçərkən, o, əllə oynadı. Üstəlik, "Qəbələ"nin 77 nömrəli futbolçusu məni təxribata çəkirdi. Bu, hakimin gözü qarşısında baş versə də, rəqib oyunçu cəzalandırılmadı. Bir sözlə, hakimlərin "Neftçi"yə kömək etdiyini deyənlər yanılırlar. Bizim hakim yardımına ehtiyacımız yoxdur. İnşallah, növbəti oyunlarda yaxşı nəticələr qazanıb, çempionluq titulunu qoruyacağıq" - deyə Georgievski bildirib.
