23 noyabr 2011 13:09
Azərbaycan yığması 4 pillə irəlilədi
FİFA dünya yığmalarının növbəti reytinq siyahısını açıqlayıb. Azerisport.az xəbər verir ki, Azərbaycan millisi bu dəfəki reytinq cədvəlində irəliləyib.
Belə ki, Berti Foqtsun çalışdırdığı komandamız 4 pillə irəliləyərək 113-cü sıraya yüksəlib. Xallarının da sayını artıran (+35) millimiz hazırda 300 xala malikdi.
Yığmamızın DÇ-2014-dəki rəqiblərinə gəlincə, Portuqaliya 1100 xalla 7-cidi və ötən ayla müqayisədə bir pillə irəliləyib. Elə Rusiya da bir pillə irəliləyib və 971 xalla 12-ci sırada qərarlaşıb. İsrail də ötən ayla müqayisədə minimal irəliləyişə nail olub və 665 xalla 37-cidi. Şimali İrlandiya millisi 5 pillə geriləyib. Bu ölkənin yığması hazırda 403 xalla 89-cudu. Ən pis nəticə isə Lüksemburqa məxsusdu. Bu komanda 9 pillə geriləyərək 252 xalla 127-ci sırada qərarlaşıb.
Bütövlükdə isə, reytinq siyahısına yenə İspaniya başçılıq edir. Ümumiyyətlə, ilk dördlükdə ötən ayla müqayisədə heç bir dəyişiklik olmayıb: İspaniya - 1564, Hollandiya - 1365, Almaniya - 1345, Uruqvay - 1309. İngiltərə iki pillə irəliləyərək 1173 xalla 5-ci olub. Braziliya bir pillə geriləyib və hazırda 1143 xalla altıncı sırada qərarlaşıb. Portuqaliya 7-ci (1100), Xorvatiya 8-ci (1091), İtaliya 9-cu (1082), Argentina 10-cudu (1067 xal).
Qeyd edək ki, növbəti reytinq cədvəli dekabrın 21-də açıqlanacaq.
