24 noyabr 2011 16:36
"Hətta məşqlərdən sonra qalıb, öz səhvlərim üzərində işləyirəm”
“İnter"in yarımmüdafiəçisi Nizami Hacıyev müsahibəsində "Qarabağ"a qarşı keçirilən görüş barədə danışıb, AZAL-la keçiriləcək oyun haqqında fikirilərini açıqlayıb və milli komandadakı debütündən söhbət açıb. Azerisport.az həmin müsahibə ilə sizi tanış edir.
- Öncə "Qarabağ" komandasına qarşı keçirilən görüş barədə fikirlərini öyrənmək istərdik...
- "Qarabağ" Azərbaycanın ən titullu klublarından biridir. Oyun çox çətin alındı. Qarşılaşma gərgin mübarizə şəraitində keçdi və zənnimcə, heç-heçəni layiqli nəticə kimi qələmə vermək olar. Düzdür, biz qələbəyə köklənmişdik, növbəti üç xalı qazanmaq istəyirdik. Bunun üçün əlimizdən qələni etdik, amma əfsuslar olsun ki, qələbə qazana bilmədik. Buna baxmayaraq, fikirimcə, heç-heçə də bizim üçün pis nəticə sayıla bilməz, ona görə ki, digər liderlər də xal itkisinə məruz qaldılar və bizdən uzaqlaşa bilmədilər.
- Oyun boyu, həm birinci, həm də ikinci hissədə sən müxtəlif məsafələrdən tez-tez qapıya zərbə endirirdin. Bu, məşqçinin tapşırığı idi, yoxsa...?
- Yox, məşqçi mənə heç nə deməmişdi. Məndə, sadəcə, qol vurmaq hissi və istəyi var idi. Çox arzulayırdım ki, fərqlənim və komandamıza qələbə qazandırım, ən əsası da ona görə ki, qələbə bizi turnir cədvəlinin 1-ci pilləsinə yüksəldirdi. Məhz buna görə də tez-tez qapıya zərbə endirirdim.
- Oyundan sonra keçirilən mətbuat konfransında "İnter"in baş məşqçisi Kaxaber Tsxadadze bildirdi ki, komandanın bəzi futbolçularında soyuqqanlıq çatışmır. Bu fikirə sənin münasibətini öyrənmək istərdik...
- Əgər baş məşqçi bunu deyirsə, deməli, bu həqiqətən də çatışmayan cəhətlərimizdən biridir. Bəzi epizodlarda bizə soyuqqanlıq çatışmır. Qol epizodlarında daha soyuqqanlı olsaq hər şey daha fərqli və bizim üçün daha yaxşı ola bilər.
- Sən artıq qeyd etmisən ki, qələbə "İnter"i turnir cədvəlinin 1-ci yerinə çıxarırdı, bununla belə, heç-heçə də komandanın irəliləməsinə imkan verdi və artıq "İnter" "Neftçi" klubunu qabaqlaya bildi...
- Mən elə fikirləşirəm ki, bizim bugünə olan turnir vəziyyətimiz normaldır. Nəticələr əla olmasa belə, onları yaxşı adlandırmaq olar. İnşallah qarşıdakı görüşdə AZAL-ı məğlub edəcəyik və turnir cədvəlindəki mövqeyimizi daha da yaxşılaşdıraçağıq. Bildiyiniz kimi, AZAL-dan sonra bizi Lənkərana çətin səfər gözləyir. Mənim fikirimcə, biz qarşıdakı oyunda qələbə qazanmağı bacarsaq, o zaman "Xəzər-Lənkəran"a qarşı meydana daha rahat çıxa bilərik. Qələbə qazandıqdan sonra öz güçünə daha çox inanmağa başlayırsan və zənnimcə, bu amil bizə Lənkəranda keçiriləcək oyunda böyük köməklik göstərə bilər. Ona görə də biz AZAL-a mütləq qalib gəlməliyik.
- Dediyin kimi, növbəti rəqib – AZAL-dı. Bu komandada bir az əvvəl məşqçi istefası baş verdi və bundan sonra onlar ardıcıl iki qələbə qazana bildilər. Qarşıdakı görüş və rəqib komanda barədə fikirlərini bilmək maraqlı olardı...
- Biz hər bir rəqibə hörtmətlə yanaşırıq, AZAL klubuna da həmçinin. Onların əvvəlki məşqçisi istefa verdikdən sonra bu klub ardıcıl iki qələbə qazanıb. Buna baxmayaraq, biz çalışacağıq ki, öz oyunumuzu göstərib avtivimizə növbəti üç xal yazaq. Bizi rəqibin formada olması və ya olmaması elə də maraqlandırmır, biz hər oyuna qələbə ardınca çıxırıq və məqsədlərimiz dəyişməzdir.
- "Qarabağ"la oyundan əvvəl Azərbaycanın milli komandasının sıralarında iki görüş keçirmişdin. Belə sıx qrafikdə, yəni ki, bir həftə ərzində 3 dəfə meydana çıxmaq sənin üçün çətin olmadı?
- Deməzdim ki, çətin oldu. Futbolçu, sadəcə, özü hər oyuna hazırlaşmalıdır. Hər bir prosesi vaxtı-vaxtında eləyərək, belə qrafikdə oynamaq olar. Axı İspaniyada və İngiltərədə klublar hər üç gündən bir meydana çıxır. Əgər məşqçi məni meydana buraxırsa, deməli, vəziyyətim və formam qənaətbəxşdir. Özüm də həmişə komandaya fayda verməyə çalışıram.
- Yeri gəlmişkən, bu sənin yığma komandada debüt oyunların idi. Yəqin ki, bu anı səbirsizliklə gözləmisən? Millidəki debüt təəssüratlarını bizimlə bölüşə bilərdin?
- Məni yığma komandaya çağırdılar və böyük məmnuniyyətlə bu təklifi qəbul etdim. Deyə bilərəm ki, milli komandada oynamaq mənim üçün böyük şərəfdir. Həm Albaniya, həm də "Union" klublarına qarşı keçirilən oyunlarda mən əlimdən gələni etməyə çalışdım ki, komandaya kömək edim. Bilirsiniz, yığmada oynayanda birinci planda ölkənin adı gedir və ona görə də futbolçu daha da istəkli və məsuliyyətli olur. Məni yenə yığmaya dəvət etsələr, yenə də canla-başla çalışaram ki, komanda üçün əlimdən gələn köməyi göstərim, ölkə bayrağının daha yüksəklərə ucadılmasına öz tövhəmi verim.
- Keçən mövsüm sənin üçün uğursuz alındı. Yayda "İnter"ə qayıtdın və mövsümdən əvvəlki təlim-məşq toplanışında əsasən formanı bərpa etməklə məşğul oldun. İndi necə, deyə bilərik ki, sən artıq formanın "pik nöqtəsində"sən? Yoxsa...?
- Deməzdim ki, "pik nöqtəyə" çıxmışam, amma məşqdən-məşqə və oyundan-oyuna özümdə artım hiss edirəm. Öz üzərimdə çox çalışıram və istəyirəm ki, öz oyunumla komandaya kömək edim. Mən hətta məşqlərdən sonra qalıb, öz səhvlərim üzərində işləyirəm. İnanıram ki, irəlliyən vaxtda daha yaxşı oyun sərgiləyə bilərəm. (klubun saytı)
