29 noyabr 2011 11:33
Mirça Rednik 100-ə çatdı
“Xəzər Lənkəran” indiki baş məşqçisi Mirça Rednikin rəhbərliyi altında topladığı xalların sayını 100-ə çatdırıb. Azerisport.az xəbər verir ki, bu, Premyer Liqanın 14-cü turunun “Simurq”la oyununda gerçəkləşib.
Zaqatala səfərindən 2:2 hesablı heç-heçə ilə dönüb aktivinə 1 xal yazan komandamız rumıniyalının başçılığı altında 54-cü oyununu keçirib. Bu görüşlərdə 27 qələbəsi olan “Xəzər Lənkəran” 19 dəfə 1 xalla kifayətlənib. Azərbaycana gələndən cəmi 8 məğlubiyyət görən Rednikin yetirmələrinin qazancı bununla da 100 xala çatıb. Bu klub tarixində 3-cü göstəricidi. Hazırda Rednik 2-ci olan Rasim Karadan cəmi 7 xal geri qalır.
“Simurq”la oyunda vurulan 2-ci qol da Rednik üçün əlamətdar olub. Belə ki, bu onun rəhbərliyi altında vurulan 70-ci – yubiley qol olub.
Baş məşqçinin 2 yubileyi ilə yanaşı 2 futbolçu da Zaqatalada əlamətdar hadisə ilə üzləşib. Qapıçı Kamran Ağayev klubun heyətində 140-cı, Azərbaycan milli komandasının digər üzvü Branimir Subaşiç isə 10-cu matçını keçirib.
