30 noyabr 2011 16:00
AFFA Foqtsdan Vaqif Cavadovun bağışlanmasını xahiş edəcək
Rusiyanın “Volqa” klubunun futbolçusu Vaqif Cavadovun Azərbaycan milli komandasından kənarlaşdırılmasına dair qərara AFFA yenidən baxacaq. Azerisport.az xəbər verir ki, sözügedən məsələ bu gün AFFA İcraiyyə Komitəsinin iclasında müzakirəyə çıxarılıb.
İK-nın iclasında komitə üzvləri Ələkbər Məmmədov və Kazbek Tuayev 23 yaşlı hücumçunun yığmamıza qaytarılması barədə məsələ qaldırıblar. Onlar futbolçunun cavanlıq səhvinə yol verdiyini bildirərək, bu məsələnin anlayışla qarşılanmasını xahiş ediblər. Federasiya prezidenti isə bu məsələni Foqtsla müzakirə edəcəyinə və müsbət həllinə kömək edəcəyinə söz verib. Bununla belə, R.Abdullayev hər bir futbolçunun öz yerini bilməli olduğunu əlavə edib.
Qeyd edək ki, Vaqif Cavadovun 2012-ci il Avropa çempionatının oktyabrın 7-də Azərbaycan və Avstriya milliləri arasında keçirilmiş seçmə qrup matçından sonra heç bir səbəb olmadan komandamızın düşərgəsini tərk etdiyini açıqlanıb. AFFA İntizam Komitəsi futbolçunu 1 il müddətinə yığmadan kənarlaşdırıb. Berti Foqts isə baş məşqçi olacağı müddətdə Cavadovu bir daha yığmaya çağırmayacağını bildirib.
