30 noyabr 2011 18:57
Azərbaycan kuboku yeni qalmaqala səhnə oldu
"İnter" - "Turan" oyununda qalmaqal yaranıb. Azerisport.az xəbər verir ki, Tovuz klubu Azərbaycan Kubokunun 1/8 final mərhələsi çərçivəsində baş tutan oyunu davam etdirməkdən imtina edib.
Buna "Turan"ın "İnter"in vurduğu ikinci qoldan narazı qalması səbəb olub. Tovuz klubu qolun qaydalar çərçivəsində vurulmadığını bildirib. Belə ki, bu qol hakimlər arasında da anlaşılmazlığa səbəb olub. Asif Mirili topu qapıdan keçirəndən sonra Fuad Həsənov mərkəzi göstərib. Lakin yan xətt hakimi Elman Musayev mərkəzə doğru getməyərək, qol olmadığına işarə vurub. Bu zaman Həsənov onun yanına gedib və qısa müzakirədən sonra Musayev də qolu qeydə alıb.
Bu səbəbdən "Turan" ikinci yarıda meydana çıxmayıb. "İnter"in futbolçuları rəqibi təxminən 30 dəqiqə meydanda gözləsə də, tovuzlular oyuna qayıtmayıb. Onlar formalarını dəyişərək, stadionu tərk ediblər. Bu səbəbdən də matç yarımçıq qalıb. "Turan"ı texniki məğlubiyyət və sanksiyalar gözləyir.
