1 dekabr 2011 22:52
Toni Adamsın İsveç klubuna keçidi baş tutmadı
"Qəbələ"nin sabiq baş məşqçisi Toni Adamsın İsveçdə işləmək variantı baş tutmayıb. Azerisport.az xəbər verir ki, bu ölkənin "Elfsborg" klubu 45 yaşlı ingilis mütəxəssisi sükanı arxasına gətirməyi düşünsə də, bunu reallaşdırmağı lazım bilməyib.
İsveçin yüksək liqa təmsilçisi yerli mütəxəssislə iş birliyinə üstünlük verib. "Elfsborg”un direktoru Stefan Andreassos İsveçin 21 yaşlılardan ibarət yığma komandasının baş məşqçisi Yorgen Lennartssonun üzərində seçim etdiklərini bildirib.
Qeyd edək ki, London Arsenalının əfsanəvi kapitanı olan, İngiltərə yığmasında 66 oyun keçirən Adams ötən ay ailə problemlərinə görə “Qəbələ” ilə yollarını ayırdı. Keçmiş müdafiəçi ölkəmizdə il yarımlıq fəaliyyətinə kimi vətənində “Wycombe Wanderers” və “Portsmouth” klublarını çalışdırıb.
