3 dekabr 2011 11:37
Premyer Liqa, 15-ci tur: Elxan Abdullayevin proqnozu
AZAL-ın sabiq baş məşqçisi Elxan Abdullayev azerisport.az saytı üçün Premyer Liqanın 15-ci turunun oyunları ilə bağlı proqnozlarını açıqlayıb.
Neftçi – Simurq
Kubok matçında “Simurq” “Neftçi”yə qarşı pis oynamadı. Amma hər şeyə rəğmən, nəticə qazana bilmədi. Sergey Yuranın komandası yaxşı oyun sərgiləyir. Lakin bu oyunda mənim favoritim “Neftçi”di. Meydan sahiblərinin bu oyunda xal itirəcəklərini düşünmürəm. Bakılılar qələbə qazanmalıdı.
Qəbələ - Sumqayıt Şəhər
“Qəbələ”yə üstünlük verirəm. Düzdü, “Sumqayıt Şəhər” kifayət qədər yaxşı komandadı. Amma “Qəbələ”də onlar üçün çətin olacağını düşünürəm. Hətta Quzanlıda “Qarabağ”a qarşı oynamaqdan da çətin olmalıdı. Düşünürəm ki, meydan sahibləri qələbə qazanacaq.
Turan – Qarabağ
Hava şəraitindən çox şey asılıdı. Əgər yağış olsa, “Qarabağ”ın problemləri olacaq. Çünki Tovuz stadionunda oynamaq ümumiyyətlə çətindi. Bura hava şəraitinin pis olmasını da əlavə etsək, onda vəziyyət daha da çətinləşər. Mənə elə gəlir ki, “Qarabağ” qələbə qazanmalıdı.
Xəzər Lənkəran – İnter
“İnter” son oyunlarında çox yaxşı təsir bağışlayır. Komandanın yüksəlişdə olduğu görünür. Amma Lənkəranda onlara çətin olacaq. Xüsusilə də meydança baxımından. Onlar süni meydançada hazırlaşırlar, Lənkəranda isə təbii örtükdü. Heç-heçə daha inandırıcı görünür.
AZAL – Bakı
AZAL son üç turu yüksək səviyyədə keçirib. Komanda özünə gəlməkdədi. Düşünürəm ki, onların məğlubiyyətsiz seriyası bu dəfə də davam edəcək. Bu oyunda da heç-heçə olacağını düşünürəm.
Rəvan – Kəpəz
“Rəvan”a simpatiyam var. Bu, mövsümün sürpriz komandasıdı. Onlar istənilən komandadan xal ala bilərlər. Baxımlı və maksimum oyun sərgiləməyə çalışan komandadı. Fikrimcə, “Kəpəz”in bu oyunda şansları aşağıdı. “Rəvan” qələbə qazanmalıdı.
