4 dekabr 2011 20:28
Xəzər Lənkəran Redniki istefaya göndərdi
"Xəzər Lənkəran"ın baş məşqçisi Mirça Rednik istefa verib. Azerisport.az xəbər verir ki, ötən mövsümün əvvəlindən cənub təmsilçisini çalışdıran rumıniyalı mütəxəssis Premyer Liqanın 15-ci turunun “İnter”lə oyunundan sonra postundan getdiyini açıqlayıb.
Belə ki, komandasının doğma meydanda aldığı 0:1 hesablı məğlubiyyətdən sonra Rednik qarşılıqlı razılaşma ilə klubdan ayrıldığını bildirib: "Məncə, artıq getməliyəm. Bu, "Xəzər Lənkəran" və mənimçün ən faydalı qərar olardı. İndiyədək yazılırdı ki, Rednik istefa verib, yaxud istefaya göndərilib. Xeyr, belə şey olmamışdı. İstefa yalnız indi baş verdi. Mən artıq qarşılıqlı razılaşma ilə klubla yollarımı ayırıram".
Artıq rəhbərliyin də onun bu qərarını müsbət qarşıladığı bildirilir. Cənub təmsilçisinin yeni çalışdırıcısının kimliyinə yaxın günlərdə aydınlıq gətirilməlidi.
Klubun rəsmi saytı da məlumatı təsdiqləyib. Bəyanatda bildirilir:
"Bu gün Azərbaycan çempionatı çərçivəsində baş tutmuş oyundan sonra "Xəzər Lənkəran" Futbol Klubunun rəhbərliyi ilə komandanın baş məşqçisi Mirça Rednik arasında görüş keçirilib. Komandanın son qarşılaşmalarda göstərdiyi nəticələr nəzərə alınmaqla qarşılıqlı şəkildə klubun rumıniyalı mütəxəssislə yollarını ayırması qərara alınıb.
"Xəzər Lənkəran" Futbol Klubu Mirça Rednikə klubda çalışdığı dövr ərzində gördüyü işlərə görə təşəkkür edir və ona gələcək karyerasında uğurlar arzulayır".
"Xəzər Lənkəran" Futbol Klubu Mirça Rednikə klubda çalışdığı dövr ərzində gördüyü işlərə görə təşəkkür edir və ona gələcək karyerasında uğurlar arzulayır".
