5 dekabr 2011 16:26
Bəxtiyar Soltanov qol vuranda Qarabağ...
“Qarabağ” Premyer Liqanın 15-ci turunda “Turan”la qarşılaşdı. Azerisport.az xəbər verir ki, gərgin keçən qarşılaşmada bu komanda 1:0 hesabıyla qələbə qazandı. Görüşün startlndaca Bəxtiyar Soltanovun vurduğu qol oyunda həlledici oldu. Qələbə topunun müəllifinin Bəxtiyar olması maraqlı bir məqamı ortaya çıxarıb.
Belə ki, tovuzlularla oyunda qol vurmaqla Bəxtiyar cari mövsüm bir ilkə imza atdı. 22 yaşlı forvard “Qarabağ”ın heyətində 3 “cəbhə”də - Avroliqa, Premyer Liqa və kubokda fərqlənən ilk futbolçu kimi fərqləndi. Soltanov ilk dəfə Avroliqada fərqlənib. “Qarabağ”ın heyətində debüt etdiyi maçda “Banga”nın qapısına 4-cü topu vurub. Maraqlıdı ki, Soltanov avrokuboklarda daha bir əlamətdar qələbənin müəllifi olub. 3-cü mərhələdə “Brügge”ylə oyunda qələbə gətirən qolun müəllifi məhz Bəxtiyar olub. Ölkə kubokunun 1/8 finalında “Sumqayıt Şəhər”lə oyunda darmadağının (3:0) əsasını qoyan gənc “qolçu” Premyer Liqada qol vurmaq üçün “Turan”la oyunu “gözlədi”. O, tovuzlularla oyunda qol vurmaqla bütün cəbhələrdə qol sevincini “daddı”.
Maraqlıdı ki, Bəxtiyarın qol vurduğu bütün oyunlarda “Qarabağ” qələbə qazanmaqla yanaşı qol da buraxmır (“Banqa” – “Qarabağ” 0:4, “Qarabağ” – “Brügge” 1:0, “Qarabağ” – “Sumqayıt Şəhər” 3:0, “Turan” – “Qarabağ” 0:1).
Üstəlik, Bəxtiyar ümumilikdə 4-cü qolunu vurmaqla cari mövsüm eyni sayda qol vuran Rauf Əliyev (1 AL, 3 çempionat) və Əfran İsmayılova (3 çempionat, 1 kubok) çatdı.
“Qarabağ”ın mətbuat xidməti
