Bernard Raab: Bu mövzuda Foqtsla söhbətim olmadı

“Sumqayıt Şəhər”in baş məşqçisi Bernard Raab ötən gün baş tutan Azərbaycan yığmasıyla yoxlama matçından (2:1) sonra azerisport.az saytının suallarını cavablayıb.

 

- Azərbaycan yığmasıyla oyunu necə dəyərləndirərdiz?
- Bu, yoxlama oyunu idi. Buna görə də az şans qazanan futbolçulara oynamaq imkanı yaratdıq. Əvəzedici heyətin də futbolçularını sınadıq. Optimal heyətlə oynamasaq da, çıxışımızdan və nəticədən razı qaldım. Əlbəttə, ilk yarıda ikinciyə nisbətən daha yaxşı idik. Halbuki, ikinci yarıda daha bir qol vura bilərdik. Sonrakı qol epizodlarını da dəyərləndirsəydik, pis olmazdı.

- Oyunun sonlarında yan xətt hakiminə kəskin narazılığınızı bildirirdiz. Deyəsən, Berti Foqtsun komandasına qalib gəlmək istəyi çox güclü idi...

- Təkcə Berti Foqtsun komandasına qarşı deməzdim. Biz oynadığımız hər rəqiblə dueldən qələbə ilə ayrılmaq istəyirik. Matçın sonunda beş dəqiqə artıq oynadıq. Bu, nəyə lazım idi ki? Həm də hava çox soyuq idi (gülür).

 

- Komandanız meydanda çox kobud oyunu ilə diqqət çəkirdi. Bu, xüsusi tapşırıq idi?

- Mən futbolçularımdan həmişə meydanda var gücləri ilə oynamağı, aqressiv olmağı tələb edirəm. Bu, sınaq matçı idi. Ona görə futbolçularımdan bunu özüm tələb etmişdim.

 

- Foqtsa öz yetirmələrinizdən hansınısa təklif etmək arzunuz yox idi?

- Bununla bağlı Foqtsla söhbətim olmadı. O, artıq 2-3 futbolçumuza dəvət göndərib. Lazım gəldikcə, gələcəkdə də dəvət göndərər.

- 3 turdan sonra Premyer Liqada fasilə yaranacaq. Son pillədən çıxmağınız nə dərəcədə realdı?

- Dekabrın 20-də son matçımıza çıxacağıq. Ümid edirəm ki, həmin oyundan sonra komandamı axırıncı pillədə görməyəcəm.

 

- Qarşıdakı turun “Kəpəz”lə oyununu necə dəyərləndirərdiz?

- “Kəpəz”, “Rəvan”, “Turan” və “Sumqayıt Şəhər” eyni səviyyəli komandalardı. Belə kollektivlərlə oynamaq çox çətindi. Biz son turda “Qəbələ”yə qalib gəlməyə yaxın idik. Ümid edirəm ki, həmin oyunda bacarmadığımızı “Kəpəz”lə görüşdə həyata keçirə biləcəyik.