8 dekabr 2011 16:54
Arif Əsədovu işsiz qoyan məşqçi qovuldu
UEFA Çempionlar Liqasında Fransanın “Olympique” (Lion) klubuna dünənki biabırçı məğlubiyyəti (1:7) Xorvatiya “Dinamo”sunun (Zaqreb) baş məşqçisi Krunoslav Yurçiçə baha başa gəlib. Azerisport.az xəbər verir ki, matçdan dərhal sonra o, rəhbərlik tərəfindən istefaya göndərilib.
Qeyd edək ki, "Dinamo" turnirin antirekordunu müəyyənləşdirib. Qrupda altı oyunun hamısında uduzan Xorvatiya təmsilçisi rəqib qapısına 3 qol vurub, öz qapısından 22 top buraxıb. Özü də Fransa təmsilçisiylə oyun böyük səs-küyə səbəb olub. Məsələ burasındadı ki, Hollandiya mətbuatı “Dinamo”nun bu rəqibinə bilərəkdən 1:7 hesabıyla məğlub olduğunu iddia edir. Bundan əlavə Zaqreb klubunun müdafiəçisi Domaqoy Vidanın matçdan əvvəl bu oyuna pul qoyuluşu etdiyi bildirilir. Görüşə gəlincə, ilk hissəsi 1:1 hesabıyla başa çatan oyunun ikinci 45 dəqiqəsində fransızlar altı qol vuraraq 7:1 hesablı qələbə qazanıblar. Bununla da onlar vurulan və buraxılan topların daha yaxşı fərqinə görə səkkiz xalı olan Hollandiyanın “Ajax” klubunu qabaqlayaraq Çempionlar Liqasının 1/8 finalına vəsiqə qazanıblar.
Xatırladaq ki, "Dinamo" ÇL-in təsnifat mərhələsində Azərbaycan çempionu «Neftçi»ni mübarizədən kənarda qoymuşdu. Məhz bu uğursuzluqdan sonra Arif Əsədov postundan uzaqlaşdırılmışdı.
