9 dekabr 2011 01:23
“Yenidən zirvəyə yüksəlməyə çalışacağıq”
Futbol üzrə Azərbaycan birinci divizionunda ötən tur səfərdə “Energetik”ə məğlub olan “Karvan”ın baş məşqçisi Zakir Mahmudov məğlubiyyətin səbəbini əsas heyətin bir neçə futbolçusunun zədəli olmasında görür. Azerisport.az xəbər verir ki, o, bu barədə açıqlamasında aşağıdakıları dilə gətirib:
“Ötən tur səfərdə gözlənilməz məğlubiyyətə uğradıq. Əsas heyətin bir neçə futbolçusu – Kənan Kərimov, İsmayıl Məmmədov, Kənan Seyfullayev zədəli olduqlarından, Anar Həsənov isə cəzalı olduğundan meydana çıxa bilmədilər. Ona görə də əsasən gəncləri meydana buraxmışdım. İlk hissədə biz üstün olsaq da, ikinci hissədə rəqib nisbətən üstünlüyü ələ aldı. Oyunun sonlarında təsadüfi bir epizodda qapımızdan qol buraxdıq. İtkilərin çox olması komandanın orta xəttinin zəifləməsinə gətirib çıxardıb. Hazırda çempionatda ən güclü heyət bizdədir. Ona görə də ikinciliklə heç cür razılaşa bilmirəm. Növbəti oyunlarda qələbə qazanıb yenidən zirvəyə yüksəlməyə çalışacağıq. Yevlaxda “Bakılı”nı qəbul edəcəyik. Bu komandaya Azərbaycan kubokunda məğlub olmuşduq. Çox güclü komandadır, ağır oyun olacaq. Əsas heyətdən Orxan Məmmədov cəzalı, İsmayıl Məmmədov, Murad Ağakişiyev, Kənan Seyfullayev isə zədəli olduqlarından meydana çıxa bilməyəcəklər. Ancaq Anar Həsənovun cəzası başa çatıb və o, bu qarşılaşmada iştirak edəcək”. (PFL)
