12 dekabr 2011 11:18
Slavço Georgiyevski: İnterdən də revanş almaq istəyirik
“Neftçi”nin yarımmüdafiəçisi Slavço Georgiyevski Premyer Liqanın 16-cı turunun AZAL-la oyunundan (7:1) sonra azerisport.az saytına müsahibə verib.
- Çox az adam sizin revanşınızın bu qədər ağır olacağını gözləyərdi...
- Biz sadəcə göstərdik ki, əsl çempionuq. Bir qələbəyə görə o qədər də çox sevinməyə dəymir. Qoy bunu rəqiblərimiz yaxşı başa düşsün. Gördüyünüz kimi, belə də olur. “Xəzər Lənkəran”la revanş matçımızın necə alındığı yadınızdadı? Bu da AZAL üzərində revanşımız idi.
- Belə istək nə ilə bağlıdı?
- İndi artıq hamı çempiona hörmət edir, başa düşür ki, bu klub Azərbaycanın ən güclüsüdü. “Neftçi”ni bir dəfə udan komanda çempion olmur. Bütün rəqibləri yenmək lazımdı. Necə ki, biz bunu bacarırıq.
- İndi artıq hamı çempiona hörmət edir, başa düşür ki, bu klub Azərbaycanın ən güclüsüdü. “Neftçi”ni bir dəfə udan komanda çempion olmur. Bütün rəqibləri yenmək lazımdı. Necə ki, biz bunu bacarırıq.
- Oyun barədə nə deyərdiz?
- Nə demək olar? İki komanda arasında böyük fərq var idi. Bax buna görə də belə nəticə qeydə alındı. Bu, təsadüf deyildi. “Neftçi”ylə oynayan komandalar ilk növbədə müdafiəni düşünməlidilər.
- Bu, sizin üçün “Neftçi”nin heyətindəki ən böyük hesablı qələbədi...
- Bəli. Buna görə çox şadam. Yaxşı ki, belə qələbədə mənim də qolum var.
- Adətən, belə qələbələr komandaları psixoloji cəhətdən dəyişdirir...
- Şübhəsiz ki, bu, əlavə əminlik gətirir. Belə bir uğuru təkrarlamaq üçün yeni motivasiya yaradır. İndi bizim düşüncəmizdəki yeganə fikir yenidən Premyer Liqanın qalibi olmaqdı.
- Amma qarşıda sizi ən yaxın izləyicinizlə oyun gözləyir...
- Daha bir revanş almaq şansımız var. Axı “İnter”ə də birinci dövrədə uduzmuşduq. Həm də ilin sonuna kimi üstünlüyümüzü daha da möhkəmləndirməliyik. Əgər “İnter”lə “Kəpəz”i yenməyi bacarsaq, ciddi xal ehtiyatımız yaranacaq.
