13 dekabr 2011 13:34
Lənkəranda və Tovuzda növbəti qalmaqal!
Son dövrlər qalmaqallardan başı açılmayan “Turan” və Tovuz futbolu, eləcə də Lənkəran daha bir qalmaqalın mərkəzinə düşüb. Azerisport.az xəbər verir ki, bu dəfəki qalmaqal U-17 Liqanın oyunu zamanı baş verib.
Belə ki, 15 noyabr 2011-ci il tarixdə baş tutan U-17 Liqanın “Turan” – AZAL matçının 68-ci dəqiqəsində AZAL-ın futbolçusu Elvin Kazımzadə əllə oyuna görə ikinci sarı vərəqə alaraq meydandan kənarlaşdırıldığı üçün bu futbolçu 1 oyunluq cəzalanıb.
Lakin hər şey bu oyun bitəndən sonra başlayıb. Oyun başa çatdıqdan sonra stadionun direktoru Yusif Cəfərov AZAL-ın futbolçusu Elməddin Hüseynzadəyə yaxınlaşaraq ona zərbə endirib. Bu səbəbdən həmin şəxs 12 oyunluq cəzalanıb. Bu hadisədən sonra hər iki klubun futbolçuları arasında insident baş verib və AZAL klubunun futbolçularına azarkeşlər tərəfindən hücum edilib.
Yuxarıda göstərilənləri nəzərə alaraq, AFFA adıçəkilən yarışlarda təhlükəsizliyə ciddi nəzarət olunmasını və təhlükəsizlik təbbirlərini gücləndirməyi tələb edib. Analoji hadisənin təkrarlanacağı təqdirdə “Turan” klubuna qarşı daha ciddi sanksiyalar tətbiq ediləcəyi bəyan olunur.
5 dekabr 2011-ci il tarixdə keçirilməli olan “Kəpəz” – “Turan” matçında isə Tovuz klubu iştirak etmədiyi üçün kluba 0:3 hesablı texniki məğlubiyyət verilib.
Daha bir qalmaqal Lənkəranda baş verib. 4 dekabr 2011-ci il tarixdə baş tutan U-14 Liqanın “Masallı” – “Xəzər Lənkəran” matçı başa çatdıqdan sonra “Xəzər Lənkəran”ın məşqçisi Məhərrəm Bağırzadə hakimləri təhqir etdiyi üçün məşqçi 5 oyunluq cəzalanıb. Oyun başa çatdıqdan sonra azarkeşlərdən biri yan xətt hakimi Orxan Səfiyevə yaxınlaşaraq ona zərbə endirib. Bu səbəbdən də yarışları keçirən departament və Regional Futbol Federasiyasından oyunlarda təhlükəsizliyə ciddi nəzarət etmək və təhlükəsizlik tədbirlərini gücləndirmək tələb olunub.
