13 dekabr 2011 13:57
Tovuzda hakimləri döyənlərin istintaqı davam edir
Premyer Liqanın 15-ci turunun “Turan” və “Qarabağ” arasında dekabrın 4-də keçirilmiş qarşılaşmasından sonra hakimlər briqadasının döyülməsi faktı ilə bağlı istintaq yaxın 15 gün ərzində başa çatacaq. Azerisport.az xəbər verir ki, araşdırma müddəti kimi 3 ay təyin olunsa da, prosesin mümkün qədər tez yekunlaşdırılması nəzərdə tutulub.
Şübhəli qismində saxlanılan Habil Aslanov ifadəsində hakimlər otağına daha 3 şəxslə birgə pəncərədən daxil olduğunu bildirib. Amma istintaq bunu inandırıcı saymır. Digər şəxslər içəridə duraraq qapıdan içəri heç kimin girməsinə imkan verməyiblər. Aslanov isə hakimləri döyərkən, onlara stəkanla da xəsarət yetirib. O, ifadəsində “Turan”ın vitse-prezidenti Nail Nurəddinoğlunun cangüdəni olmadığını, hakimləri “qeyri-obyektiv oyun idarə etdikləri üçün” vurduğunu deyib.
Habil Aslanova qarşı 2 aylıq həbs qətimkan tədbiri seçilib, Azərbaycan Respublikası Cinayət Məcəlləsinin 221.3 (Xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddəsi ilə cinayət işi açılıb. Bu maddəyə əsasən, 3 ildən 7 ilədək azadlıqdan məhrum etmə nəzərdə tutulub. Digər şəxslər isə zaminə buraxılıblar. Lakin onlar yenidən istintaq prosesinə cəlb olunacaqlar.
Yaxın vaxtlarda zərərçəkmiş və cavabdeh tərəflər arasında üzləşdirmə olacaq. Hələlik zərərçəkmiş tərəf – baş hakim Rauf Cabbarov və yan xətt hakimi Coşqun Həsənov barışdırıcı mövqedə olduqlarını bildirməyiblər.
