13 dekabr 2011 15:52
Superliqada bir gündə ikinci istefa
Türkiyə Superliqasında bir gündə ikinci istefa gerçəkləşib. Azerisport.az xəbər verir ki, 15-ci turda qeydə alınan növbəti uğursuzluq “Ankaragücü” kimi, “Orduspor”u da baş məşqçisiz qoyub.
Belə ki, bu klubun prezidenti Nedim Türkmen açıqlamasında bildirib ki, baş məşqçi Metin Diyadin artıq komandada çalışmaq istəmədiyini bildirib. Maraqlıdı ki, o, istefasına səbəb kimi bütün fikrini komandaya yönəldə bilməməsini, hazırkı işindən zövq ala bilmədiyini göstərib.
Məhz bu üzdən klub rəhbərliyi Diyadinin istefasını qəbul edib və ona gələcək işlərində uğurlar arzulayıb. Yeni baş məşqçi axtarışına bundan sonra başlanılacaq və Nedim Türkmen hətta əcnəbi mütəxəssislə anlaşmaqda daha maraqlı olduğunu bəyan edib. Hələlik isə komandanı klubda çalışan digər məşqçilər idarə edəcək.
Qeyd edək ki, “Orduspor” son turda səfərdə “Genclerbirligi” ilə səfər matçında məğlubiyyətlə üzləşib – 1:3. Komanda hazırda 18 komanda arasında 15 turdan sonra 4 qələbə, 5 heç-heçə və 6 məğlubiyyətlə 14-cü pillədə qərarlaşıb (17 xal).
Maraq üçün bildirək ki, bu gün “Orduspor”la yanaşı “Ankaragücü”nün baş məşqçisi Ziya Doğan da istefa verdiyini açıqlamışdı.
