15 dekabr 2011 19:38
Xəzər Lənkəranın veteranları da ayağa qalxdı
Son vaxtlar “Xəzər Lənkəran” klubu ətrafında yaradılan hadisələr veteranların da narazılığına səbəb olub. Azerisport.az xəbər verir ki, bu səbəbdən lənkəranlı futbol veteranları sevimli komandalarına qarşı edilən haqsız təzyiqlərə öz münasibətlərini bildiriblər.
Veteranların yaydığı bəyanatda bildirilir ki, “ağ-yaşıllar”a qarşı kampaniya aparılır: “Biz Lənkəran futbolunun veteranları olaraq, “Xəzər Lənkəran” klubu ətrafında yaşananlardan kənarda qala bilmərik. İllər boyu futbol ənənələri olan bu şəhərdə bu idman növünü öz dövrümüzdə yaşatmış insanlar kimi, bu gün doğma klub haqqında hər hansı mənfi söhbətlərin dolaşmasına etiraz bildirməyi özümüzə borc bilirik.
Hamımız şahidik ki, “Xəzər Lənkəran” klubunun əleyhinə hərtərəfli kampaniya aparılır. Bu kampaniyanın arxasında duran şəxslərin məqsədləri klubun daxilində nifaq salaraq, “Xəzər Lənkəran”ı büdrətməkdən ibarətdir”.
Qeyd olunur ki, bəzi insanlar əvvəlcə komanda daxilində çaxnaşma yaratmaq istəyiblər: “Onlar çempionatın gedişatında böyük fərqlə rəqiblərini qabaqlayan “Xəzər Lənkəran”a qeyri-idman yolları ilə təzyiq vasitələrinə əl atdılar. Sonradan təxribat xarakterli işlər azarkeşlərin daxilində aparılmağa başladı. Komandanı dəstəkləyən insanları bir-birinə qarşı qoymaqla, həmin şəxslər ən böyük azarkeş kütləsi olan kluba daha bir zərbə vurmaq niyyətini nümayiş etdirdilər.
İndi də bu planın növbəti hissəsi həyata keçirilmək üzrədir, hədəf isə klub rəhbərliyidir. Müxtəlif bəhanələrlə “Xəzər Lənkəran” rəhbərliyi, klubun idarəçiliyi ilə məşğul olan şəxslər tənqid olunur ki, bu da klubu zəiflətmək üçün atılan daha bir addımdır.
Biz futbol veteranları klub rəhbərliyinə qarşı yönələn bu addımları qəti pisləyirik və öz növbəmizdə bəyan edirik ki, “Xəzər Lənkəran” futbol klubunun həyata keçirdiyi siyasəti, klub rəhbərliyi tərəfindən qəbul edilən qərarları tam olaraq dəstəkləyirik. Lənkəran futbolunun rifahı üçün çalışan insanların əməllərinə kölgə salınmasını biz heç cür qəbul edə bilmərik və bu cür əməllərin qarşısını almaq üçün hər zaman əlimizdən gələni edəcəyik”.
Bəyanatın sonunda bildirilir ki, son dövrlərdə Lənkəranda guya hansısa ziyalıların klub rəhbərliyinin qərarlarının əleyhinə təşəbbüslə çıxış etməsi haqqında söhbətlər yayılıb: “Lənkəran futbolunun veteranları kimi, Lənkəran futboluna uzun illər əziyyətimizlə töhfə verən insanlar kimi, bəyan edirik ki, heç kimin Lənkəran futbolsevərləri adından bu kimi təşəbbüsləri irəli sürməyə ixtiyarı yoxdur. Lənkəran futbolunun rifahını düşünərək bir daha “Xəzər Lənkəran” Futbol Klubunun rəhbərliyinin siyasətini dəstəklədiyimizi bəyan edirik”.
