15 dekabr 2011 11:25
Premyer Liqa, 17-ci tur: Asim Xudiyevin proqnozu
Azərbaycanın veteran futbolçusu Asim Xudiyev azerisport.az saytı üçün Premyer Liqanın 17-ci turunun oyunlarına proqnozlarını açıqlayıb.
Bakı – Sumqayıt Şəhər
“Bakı” son turlar heç də yaxşı oyun sərgiləmir. Xeyli xal itiriblər. Fikrimcə, artıq qələbə qazanmaq vaxtı gəlib çatıb. Çünki Aleksandr Starkovun komandası çempionatın debütantı ilə üz-üzə gələcək. “Sumqayıt Şəhər” son turda “Kəpəz” üzərində 4:1 hesabıyla qalib gələrək hamını təəccübləndirsə də, çempionatın əsas favoritlərindən birinə nəsə edəcəyi inandırıcı görünmür. “Bakı” qələbə qazanacaq.
Turan – Qəbələ
Hər iki komanda son dövrlər yaxşı günlərini yaşamır. Nəzərə alsaq ki, görüş neytral meydanda keçirilir, qonaqların işi bir qədər də yüngülləşib. Qəbələlilər düz meydanda oynamağa alışıblar. Fikrimcə, heç-heçə olacaq.
AZAL – Simurq
AZAL-ın uğurlu çıxışı üçün son turdakı “Neftçi”yə məğlubiyyəti (1:7) unutmaq və toparlanmaq lazımdı. Amma nəzərə alsaq ki, “Simurq” son dövrlər çox inamlı təsir bağışlayır, “təyyarəçilər”in işi asan olmayacaq. Bu görüşdə də heç-heçə qeydə alınacağını düşünürəm.
Qarabağ – Rəvan
“Rəvan” məzmunlu oyun sərgiləyən komandadı. Amma bu, onlara heç də həmişə uğur qazandırmır. Nəzərə alsaq ki, “Qarabağ” Quzanlıda, doğma azarkeşlərinin gözü qarşısında oynayacaq, meydan sahiblərinin şansları daha çoxdu. Ağdam klubu qələbə qazanacaq.
Kəpəz – Xəzər Lənkəran
Meydan sahibləri heç də yaxşı günlərini yaşamır. Gəncəlilər təkcə pis oyun sərgiləmir, həm də nəticə qazana bilmirlər. Baş məşqçi fiziki hazırlıqdan gileylənir. “Xəzər Lənkəran”da isə kifayət qədər təcrübəli futbolçular var ki, bu oyunun gedişini dəyişə bilər. Lənkəranlılar qələbə qazanmalıdı.
İnter – Neftçi
İki liderin oyunu həmişə maraqlı olur. “Neftçi” son turlarda çox güclü təsir bağışlayır. Hücum futboluna üstünlük verir. Meydan sahibləri isə 13 turdu məğlubiyyət nə olduğunu bilmirlər. Bu görüşün taleyini bir top da həll edə bilər. Böyük ehtimalla heç-heçə olacaq.
