20 dekabr 2011 11:22
Premyer Liqa, 18-ci tur: Oqtay Abdullayevin proqnozu
Azərbaycan futbolunun veteranlarından Oqtay Abdullayev azerisport.az saytı üçün Premyer Liqanın 18-ci turunun oyunları ilə bağlı proqnozlarını açıqlayıb.
Simurq – İnter
“İnter” hazırda yüksəlişdədi. Onlar son dövrlər yaxşı nəticələr qazanırlar. Düzdü, “Simurq” da pis təsir bağışlamır. Baxmayaraq ki, son oyunlarında bir qədər uğursuzluqla üzləşirlər. Hər halda bu oyunda da “İnter”in 3 xala sahib çıxan tərəf olacağını düşünürəm.
Sumqayıt Şəhər – Turan
“Sumqayıt Şəhər” gənc, yerli və təcrübəsiz uşaqlardan qurulan komandadı. Lakin buna baxmayaraq, onlar oyundan-oyuna daha yaxşı çıxış etməyə çalışırlar. “Turan”da isə çoxsaylı problemlər öz sözünü deyir. Elə bu oyunda da bunun təsirinin olması istisna deyil. “Sumqayıt Şəhər”ə üstünlük verirəm.
Rəvan – AZAL
Öncədən proqnoz verilməsi çox çətin olan oyunlardandı. “Rəvan” çox yaxşı oynamağa başlayıb. Son turda məğlub olsalar da, sərgilədikləri oyunla onlar çox şeyə qadir olduqlarını isbatlayıblar. Öz növbəsində AZAL da “Neftçi”yə böyük hesablı yenilgini son turda “Simurq” üzərindəki darmadağınla unutdurdu. Bu oyun da çətin olacaq. Mənim fikrimcə, heç-heçə olacaq.
Qəbələ - Qarabağ
“Qəbələ”nin heyətində çoxlu yaxşı futbolçular olsa da, onlar hələ də öz oyunlarını tapa bilməyiblər. “Qarabağ”ın qələbə üçün vuruşacağını gözləyirəm. Onların qələbə qazanması təəccüblü görnüməməlidi. Amma rəqibin “Qəbələ” olduğunu, oyunun Qəbələdə keçirildiyini nəzərə alsaq, heç-heçə daha inandırıcı görünür.
Xəzər Lənkəran – Bakı
Həm “Bakı”, həm də “Xəzər Lənkəran” əla komandadı. Bu komandalar arasındakı yeganə fərq ondadı ki, paytaxt təmsilçisi hələ də öz oyununu tapa bilməyib. Çox qeyri-sabit çıxış edir. Buna görə də bu oyunda “Xəzər Lənkəran”ın qələbə qazanacağını gözləyirəm.
Neftçi – Kəpəz
Nəzərə alsaq ki, “Neftçi” turnir cədvəlinin birinci pilləsində gedir, son turda da “İnter”ə uduzublar, əminəm ki, bu dəfə artıq mütləq qələbə qazanmaq üçün hər şeyi edəcəklər. Çünki həm liderliyi saxlamaq, həm son məğlubiyyəti unutdurmaq lazımdı. Bundan əlavə qış çempionluğunu təmin etmək üçün ilin son oyunundan qələbəylə ayrılmaq vacibdi. “Kəpəz” isə son dövrlər heç də uğurlu çıxış etmir. Buna görə də “Neftçi”nin qələbə qazanacağını düşünürəm.
