20 dekabr 2011 11:34
İlham Əliyev: Bu, böyük, mötəbər yarış olacaq
Dekabrın 19-da Azərbaycan Prezidenti İlham Əliyev Sumqayıtda Olimpiya İdman Kompleksinin açılışında iştirak edib. Azerisport.az xəbər verir ki, dövlət başçısı tədbirdəki çıxışında FİFA U-17 qadınlararası dünya çempionatı Azərbaycan 2012 ilə bağlı fikirlərini bildirib:
“Gələn il Olimpiya ilidi. Eyni zamanda, gələn il Azərbaycanda qızlar arasında futbol üzrə dünya çempionatı keçiriləcək. Bu, böyük, mötəbər yarış olacaq. Bu yarışı ləyaqətlə keçirmək üçün indi Tofiq Bəhramov adına Respublika Stadionunda təmir-bərpa işləri aparılır. Biz yaxın zamanlarda Sumqayıt şəhər stadionunun təmirinə başlayacağıq. Digər şəhərlərdə stadionlar tikilir. Yəni Azərbaycan dünyada idman ölkəsi kimi özünü artıq təsdiqləyib və bu, görülən işlərin nəticəsidi. Biz ümid edirik ki, Olimpiya Oyunlarında böyük uğurla çıxış edəcəyik. Bunu deməyə kifayət qədər əsaslar var. Son illər ərzində idmançılarımız dünya və Avropa çempionatlarında qələbələr qazanıblar. Yəni bu gün Azərbaycan idmançıları ilə hesablaşırlar və beynəlxalq olimpiya ailəsində fəaliyyətimiz də yüksək qiymətə malikdi.
Bir sözlə, Azərbaycanda idman inkişaf edir, idman infrastrukturu yaradılır. İdmanla məşğul olmaq üçün hər bir bölgədə gözəl imkanlar var. Yaxın gələcəkdə hər bir rayon mərkəzində gözəl olimpiya idman kompleksləri istifadəyə veriləcək”.
