La Liqada növbəti baş məşqçi istefası

Futbol üzrə İspaniya La Liqasında növbəti baş məşqçi istefası gerçəkləşib. Azerisport.az xəbər verir ki, “Villarreal” rəhbərliyi son uğursuzluqların ardından Xuan Karlos Qarridonu qovmaq məcburiyyətində qalıb.

 

Buna isə komandanın İspaniya kubokunun 1/16 final mərhələsində 3-cü liqa klubuna (!) – “Mirandes”ə məğlubiyyəti səbəb olub. Çempionatda da işləri yaxşı getməyən komandanın rəhbərliyi məhz dünən baş tutan və rüsvayçı məğlubiyyətlə nəticələnən görüşdən sonra baş məşqçini qovmaq qərarına gəliblər.

 

Qeyd edək ki, “Villarreal” ötən mövsüm Çempionlar Liqasında vəsiqə qazanmaqla yanaşı, həm də sərgilədiyi hücum futbolu ilə rəğbət qazanmışdı. Amma komanda bu mövsümə heç də yaxşı başlamadı. ÇL-də qrup oyunlarının hamısından xalsız ayrılmaqla antirekorda imza atan ilk İspaniya klubu çempionatdakı 16 matçda da sadəcə 3 dəfə qələbə qazana bilib. Komanda hazırda 15 xalla turnir cədvəlinin aşağı pillələrində qərarlaşıb.

 

2009-cu ildən “Villareal”ı çalışdıran Qarridonu kimin əvəzləyəcəyi hələlik bilinmir.