23 dekabr 2011 14:37
AFFA Simurqu baş məşqçisiz və azarkeşsiz qoyub, 11 000 manat cərimələdi
Bu gün AFFA İntizam Komitəsinin növbəti iclası keçirilib. Azerisport.az xəbər verir ki, aparılan müzakirələrdən sonra Premyer Liqanın son turunun oyunları ilə bağlı aşağıdakı qərarlar qəbul edilib:
Premyer Liqanın 18-ci turunun “Simurq” – “İnter” matçının 54-cü dəqiqəsində “Simurq”un futbolçusu İlkin Qırtımov kobud oyuna görə birbaşa qırmızı vərəqə alaraq meydandan kənarlaşdırıldığı üçün 2 oyunluq cəzalanıb, klubu 2000 manat cərimə olunub. Oyunun 69-cu dəqiqəsində “Simurq”un baş məşqçisi Sergey Yuran texniki zona qayadalarını pozduğuna görə meydandan kənarlaşdırıldığı üçün 1 oyunluq cəzalanıb, klubu 1000 manat cərimə olunub. Matçın 69-cu dəqiqəsində “Simurq” azarkeşləri tərəfindən meydançaya atılmış kənar əşyalardan biri matçın baş hakiminin başına zədə yetirib və nəticədə ona təcili tibbi yardım göstərilib. “Simurq” azarkeşləri tərəfindən dəfələrlə meydançaya kənar əşyalar atıldığı üçün kluba aşağıdakı cərimə və cəzalar tətbiq olunur:
“Simurq” növbəti iki ev oyununu azarkeşsiz keçirsin və kluba 8000 manat cərimə verilsin. Oxşar hadisənin baş verəcəyi təqdirdə “Simurq”a qarşı daha ciddi sanksiyalar tətbiq ediləcək.
Hakimlər Komitəsi oyunun hakimlər briqadası haqqında lazımı ölçü götürüb İntizam Komitəsinə yazılı məlumat versin.
“Sumqayıt Şəhər” – “Turan” matçının 68-ci dəqiqəsində “Turan”ın futbolçusu Məhərrəm Müslümzadə kobud oyuna görə ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb, klubu 200 manat cərimə olunub.
“Rəvan” – AZAL matçında “Rəvan”ın 4 futbolçusu sarı vərəqə ilə cəzalandığı üçün klub 1000 manat cərimə olunub.
“Qəbələ” – “Qarabağ” matçının 89-cu dəqiqəsində “Qəbələ”nin məşqçisi Vüqar Məmmədov texniki zona qayadalarını pozduğuna görə meydandan kənarlaşdırıldığı üçün 1 oyunluq cəzalanıb, klubu 1000 manat cərimə olunub.
“Neftçi” – “Kəpəz” matçının 55-ci dəqiqəsində “Neftçi”nin futbolçusu İqor Mitrevski idmançıya yaraşmayan hərəkətə görə ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb, klubu 200 manat cərimə olunub. Oyunun 66-cı dəqiqəsində “Kəpəz”in futbolçusu Armand Feutçin kobud oyuna görə ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb, klubu 200 manat cərimə olunub.
