23 dekabr 2011 18:19
Arda Turan üçün yeni baş məçqçi
İspaniya La Liqa iştirakçılarından olan “Atletico”nun yeni baş məşqçisi müəyyənləşib. Azerisport.az xəbər verir ki, Türkiyə millisinin ulduz futbolçusu Arda Turanın da çıxış etdiyi Madrid təmsilçisini bundan sonra Dieqo Simone çalışdıracaq.
O, son uğursuzluqlara görə ötən gün istefaya göndərilən Qreqorio Mansanonu əvəzləyib. Komandanın İspaniya kubokunun 1/16 final mərhələsində aşağı liqa təmsilçisi "Albecete"yə 1:3 hesablı məğlubiyyətini və La Liqadakı uğursuz çıxışını nəzərə alan klub başbilənləri onunla yolları ayırmağa qərar vermişdi. İndi Dieqo Simonenin Mansanoya nə dərəcədə layiqli əvəzləyici olduğunu zaman göstərəcək. Qeyd edək ki, "Atletico" İspaniya çempionatının cari mövsümündə 16 turdan sonra 19 xalla 10-cu pillədə qərarlaşıb. Argentinalı yeni mütəxəssisin vaxtilə bu komandada futbolçu kimi çıxış etdiyini də vurğulayaq.
Yeri gəlmişkən, “Atletico” ilə eyni vaxtda baş məşqçisiz qalan La Liqanın digər təmsilçisi - “Villareal” da özünə yeni çalışdırıcı tapıb. Bu komanda isə Xuan Karlos Qarridonun boşaltdığı posta Xose Fransisko Molinanı gətirib.
Bu komandada da baş məşqçi dəyişikliyinə İspaniya kubokunun 1/16 final mərhələsində 3-cü liqa klubuna (!) – “Mirandes”ə məğlubiyyət səbəb olub. Çempionatda da işləri yaxşı getməyən komandanın rəhbərliyi məhz bu üzdən Qarridonun əvəzində Molinanı gətirib. Çünki komanda bu mövsümə heç də yaxşı başlamayıb. ÇL-də qrup oyunlarının hamısından xalsız ayrılmaqla antirekorda imza atan ilk İspaniya klubu çempionatdakı 16 matçda da sadəcə 3 dəfə qələbə qazana bilib. Komanda hazırda 15 xalla turnir cədvəlinin aşağı pillələrində qərarlaşıb.
