27 dekabr 2011 11:55
Rauf Əliyev Valencia klubunun bazasında olub
AFFA-nın I vitse-prezidenti, Milli Məclisin deputatı Rauf Əliyev İspaniyanın Valensiya şəhərində səfərdə olub. Azerisport.az xəbər verir ki, səfər çərçivəsində R.Əliyev Valensiya Regional Futbol Federasiyasının baş katibi Emilio Zamora ilə görüşüb, uşaq futbolunun inkişafı ilə bağlı fikir mübadiləsi aparıb, futbol məktəblərinin iş prinsipi ilə tanış olub.
Daha sonra Rauf Əliyev «Valencia» klubunun bazasında olub, klubun icraçı-direktoru Xordi Bruxola Ruis və beynəlxalq əlaqələr şöbəsinin rəhbəri Visente Sarion ilə görüşüb. Aparılan müzakirələrdə «Valencia» klubunun müxtəlif yaş qruplarından ibarət komandaları (o cümlədən qızlardan ibarət komandalar) ilə müvafiq yaş qrupuna daxil olan Azərbaycan komandaları arasında yoldaşlıq oyunlarının təşkil olunması barədə ilkin razılıq əldə olunub. Görüş zamanı həmçinin «Valencia» ilə ölkəmizdəki klublardan birinin «Qardaşlaşmış klublar» olması barədə fikirlər səsləndirilib və müsbət qarşılanıb.
2012-ci ilin avqust ayında «Valencia» klubunun nümayəndələrinin Azərbaycana səfər etməsi planlaşdırılır.
