29 dekabr 2011 14:26
Almaniya mətbuatı: Foqts dəli olub
Futbol üzrə Azərbaycan millisinin baş məşqçisi Berti Foqts müsahibəsində komandamızdan, eləcə də Münhenqladbax “Borussia”sından danışıb. O, öncə Milad bayramını necə qeyd etmələri haqda məlumat verib:
“Milad gününü öz oğlum Yustun və bir neçə dostumla qeyd etdim. Sadə və təvazökar bir bayram oldu”.
Foqts bildirib ki, hələ istirahət haqda düşünmür. Bu yaxınlarda millimizlə iki illik yeni müqaviləyə imza atan almaniyalı mütəxəssis ən azı müqaviləsinin sonuna kimi çalışacağını bildirib: “Təqaüd? Mən hələ bu barədə düşünmürəm. 2012-ci ili də yollarda keçirəcəm. Çoxlu toplanışlarımız, oyunlarımız olacaq”.
Millimizin çalışdırıcısı bildirib ki, komandamızı DÇ-2014-ə çıxarmaq istəyir: “Biz DÇ-2014-ün final mərhələsinə iddialıyıq”. Yeri gəlmişkən, burda Almaniya mətbuatı Foqtsun dəli olduğuna da işarə vurub. Yəni o, hər şeyə rəğmən, belə xəyallara da düşür.
“Mənim yeni tələblərim ola bilər ki, kimlərəsə ağır və sərt görünsün. Amma bu, müasir futbolda mümkün olan şeylərdi. Azərbaycanda da bunu başa düşən insanlar var”.
Foqts keçmiş komandasının – “Borussia”nın hazırkı durumuna da toxunub: “Mənim və oğlumun bu komandanın bu oyunlarına VİP biletim var. Komandanın hazırkı oyunu xoşuma gəlir. Lyusen Favr gənclərə üstünlük verdi və bu da faydasını göstərməkdədi”.
Qeyd edək ki, sabah Foqts 65 yaşını qeyd edəcək.
