30 dekabr 2011 12:28
Pavel Doroşevə görə Məmmədov-Adams-Kavlak üçlüyünün fərqi
“Qəbələ”nin qapıçısı Pavel Doroşev komandasının son dövrlərdəki baş məşqçilərini müqayisə edib. Azerisport.az saytına müsahibəsində latviyalı qolkiper birgə çalışdığı Ramiz Məmmədov, Toni Adams və Fatih Kavlak barədə bunları dilə gətirib:
“Toni Adamsın mövsümün gedişində istefa verməsi təbii ki, bizim klub üçün əsas hadisə oldu. Bu, bizi çox təəccübləndirdi. Amma artıq hər şey tarixin yaddaşına köçüb. Toni Adamsla Ramiz Məmmədov fərqli mentalitetə malik adamlar idilər. Ramiz müəllimə çox hörmət edirəm. Məni Azərbaycan futboluna o gətirdi, keyfiyyətlərimi açmaqda mənə kömək etdi. Adamsla isə əsas heyətin oyunçusu oldum. Toni ilə də əla münasibətim var idi. Amma idmanda heç nə əbədi deyil. Hər şeyi dəyişir. Bütün qapıçılar kimi mən də emosionalam. Adamsın sayəsində isə artıq emosiyalarıma sahib çıxa bilirəm. Bu, mənə təkcə meydanda yox, ondan kənarda da kömək edir. İngilisə buna görə minnətdaram. Onunla işləmək mənim üçün böyük şərəf idi. Fatih Kavlaka gəlincə, hesab edirəm ki, komanda onun rəhbərliyi altında uğur qazana biləcək. Kavlak həmişə öz yerini və nə deyəcəyini yaxşı bilir. Komandada hamı ona hörmət edir. Əgər kimisə bəyənmirsə, heyətdən çıxarır. Onun üçün əsas kollektivçilikdi”.
