Etibar Tarıverdiyev: Popoviç Kamranı millinin əsas heyətindən sıxışdıra bilər

Futbol üzrə Azərbaycan yığmasının yeni məşqçisi Etibar Tarıverdiyev azerisport.az saytına müsahibəsində bu təyinatından danışıb.

 

- Sizcə, aşağı yaş qrupları üzrə yığmalardan əsas milliyə keçməyə layiq idiniz?
- Bunu müzakirə etmək çətindi. Əgər əsas milliyə dəvət olunmuşamsa, deməli buna layiq idim. Bu təyinata görə çox şadam. Burda da özümü göstərmək istəyirəm.

 

- Berti Foqts sizi bir neçə namizədin arasından seçib. Niyə məhz siz?
- Seçim Uli Ştaynın olub. Əsas yığmanın qapıçılarla işləyən məşqçisi mənimlə yanaşı Elşad Tahirov (U-17) və Ramiz Əhmədovu da (U-19) nəzərdən keçirirdi. Almaniyalı məşqçi özü də bildirdi ki, bu məşqçilər arasında seçim etmək onun üçün çox çətin oldu.

 

- “Sumqayıt”dakı işinizi davam etdirəcsiz?
- İşləyəcəm. “Sumqayıt” böyük layihədi. Bu komandada çox perpspektivli uşaqlar cəmləşiblər. Onlar yaxın zamanlarda əsas millidə də çıxış edə bilərlər. Biz gənclərə şans veririk. Digər klublarda heç belə imkan yaradılmır.

 

- Uli Ştayn sizdən nə tələb edir?
- Mən hələ onunla gələcək işlərimiz barədə konkret söhbət etməmişəm. İndi sadəcə onu bilirəm ki, Ştaynın köməkçisi funksiyasını yerinə yetirəcəm. O, dünya səviyyəli mütəxəssisdi. Belə mütəxəssislə çalışmaq mənim ancaq xeyrimə olacaq.

 

- Sizin yığmaya gəlişinizdən sonra nə dəyişiklik gözləyə bilərik? Məsələn, az qol buraxacağıq?
- Mən istəyirəm ki, biz ümumiyyətlə qol buraxmayaq. Son seçmə mərhələdə Kamran Ağayev yaxşı təsir bağışladı. Albaniya ilə oyunda (1:0) Andrey Popoviç də özünü yaxşı tərəfdən göstərdi. Çox şey ondan asılıdı. Mən istəyirəm ki, Popoviç yaxşı qapıçı olsun. Amma o, bunu məndən də çox istəməlidi.

 

- Yaxın zamanlarda Kamran Ağayevin əsas rəqabət apardığı qapıçı kim olacaq?
- Kamran istedadlı qapıçıdı. Amma komandada rəqabət də olmalıdı. Onun əsas rəqibi Andrey Popoviç, Səlahət Ağayev və Aqil Məmmədovdu. Ola bilər Popoviç Ağayevi elə gələn tsikldən əvəz etməyə başladı, kim bilir?