XL Serbiya millisinin qapıçısını alır

Azərbaycan kubokunun sahibi “Xəzər Lənkəran” Serbiya yığmasının qapıçısı ilə güclənə bilər. Azerisport.az xəbər verir ki, cənub klubu Vladimir Stoykoviçin xidmətində maraqlıdı.

 

Bu barədə “ağ-yaşıllar”ın serb əsilli hücumçusu Branimir Subaşiç məlumat verib: “Bu yaxınlarda komandamızın baş məşqçisi postunda Mirça Redniki Cüneyt Biçər əvəzlədi. O və klub prezidenti Mais Mənsimov məndən xahiş etdilər ki, Stoykoviçi komandamıza cəlb etməyin yolları haqda düşünüm”.

 

Subaşiç Serbiya mətbuatına açıqlamasında daha sonra bunları əlavə edib: “Onlar bu transferin gerçəkləşməsində çox maraqlıdılar. Həm prezident, həm də baş məşqçi. Buna görə əminəm ki, bir neçə gün sonra Stoykoviçə Azərbaycandan rəsmi təklif gələcək”.

 

Qeyd edək ki, Stoykoviç hazırda Belqrad “Partizan”ında çıxış edir. Halbuki, 28 yaşlı qapıçı “Crvena Zvezda”nın yetirməsidi. Stoykoviç Fransanın “Nant”, Hollandiyanın “Vitesse”, Portuqaliyanın “Sporting”, İspaniyanın “Getafe” və İngiltərənin “Wigan” klublarında da forma geyməyə imkan tapıb.

 

O, Serbiya yığmasında 38 matça çıxıb. Onun ən yaddaqalan oyunlarından biri DÇ-2010-nun Almaniyaya qarşı oyunu olub. Stoykoviç qapısını toxunulmaz saxlamaqla yanaşı, həm də Lukas Podolskinin penaltisini dəf etmişdi.

 

Əgər Stoykoviç cənub təmsilçisinə gəlsə, hazırkı məqamda Premyer Liqamızda üçüncü serb qapıçı olacaq. Çünki “Neftçi”nin əsas qapıçısı Saşa Stamenkoviç olduğu halda, “Qarabağ”da da bu işi Boyan Pavloviç yerinə yetirir. “Xəzər Lənkəran”da hazırda Kamran Ağayevlə Kamal Bayramov kimi qapıçıların olduğunu da qeyd edək.