3 yanvar 2012 18:58
Latviya Starkovdan imtina etmədi
“Bakı”nın baş məşqçisi Aleksandr Starkovun futbol üzrə Latviya yığmasındakı işini davam etdirəcəyi dəqiqləşib. Azerisport.az xəbər verir ki, 56 yaşlı mütəxəssislə Latviya Futbol Federasiyası arasında aparılan danışıqlar müsbət nəticə verib və ölkəmizdə çalışan mütəxəssisin yığmanın baş məşqçisi postunda qalmasına qərar verilib.
Artıq tərəflər arasında yeni iki illik müqavilə də imzalanıb. Fevralın 29-da Starkov köhnə-yeni komandasıyla Qazaxıstana qarşı yoldaşlıq oyunu da keçirəcək. Bundan əlavə latviyalıları Polşa (22 may) və Çernoqoriya ilə (15 avqust) də görüşlər gözləyir.
LFF-nin baş katibi Yanis Mejekis bildirib ki, o, Starkovun “Bakı”dakı işinə mane olmayacaq. Amma bu məsələ yenidən gündəmə gələ bilər: “Biz hələ Starkovun yeni zamanda “Bakı”da da çalışması ilə razıyıq. Amma növbəti seçmə mərhələnin startı ərəfəsində vəziyyət dəyişə də bilər”.
Qeyd edək ki, “Bakı” rəhbərliyi də Starkovun yeni zamanda Latviya yığmasındakı işini davam etdirməsində problem görmədiklərini bildirirdi. Lakin yaxın gələcəkdə latviyalı mütəxəssisin işləri daha çox olacaq. Onun hər iki cəbhədə gərgin iş qrafikinə necə dözəcəyi və bu işinin öhdəsindən nə dərəcədə layiqincə gələcəyini zaman göstərəcək.
