3 yanvar 2012 21:05
Arazdan Superliqada uğurlu debüt (YENİLƏNİB)
Bu gün Yunanıstan Superliqasında növbəti turun görüşləri keçirilib. Azerisport.az xəbər verir ki, Azərbaycanın gənclərdən ibarət millisinin yarımmüdafiəçisi Araz Abdullayevin komandası "Panionios" doğma meydanda "Asteras"ı qəbul edib.
Bu görüşdə Arazın da Yunanıstan çempionatında debüt etməsi gözlənilirdi. Arazın adı ilk “18-liy”ə salınsa da, həmyerlimiz oyuna ehtiyat oyunçular skamyasına başlayıb. Lakin 62-ci dəqiqədə baş məşqçi onu da meydana buraxmaqla, Superliqada debüt imkanı yaradıb. Futbolçumuzun debütü də uğurlu alınıb. Belə ki, o, meydana çıxandan az sonra komandasına penalti qazandırıb. Amma təəssüf ki, komanda yoldaşı bunu boşa verib.
Qeyd edək ki, "Panionios" 15 turdan sonra 16 xalla turnir cədvəlinin 9-cu pilləsində qərarlaşıb.
Yunanıstan Superliqası
15-ci tur
3 yanvar
Panionios – Asteras – 2:0 (1:0)
Qollar: Kolovos, 42, Qundulakis, 77.
Matçın 74-cü dəqiqəsində meydan sahiblərinin oyunçusu Kuqi penaltidən yararlana bilməyib
