5 yanvar 2012 15:55
“Neftçidə uşaq futboluna böyük diqqət var”
"Neftçi"nin 1998-ci il təvəllüdlü futbolçulardan ibarət komandası Azərbaycan Respublikasının prezidenti İlham Əliyevin 50 illik yubileyinə həsr olunmuş beynəlxalq turnirdə müvəffəqiyyətlə iştirak edib. Azerisport.az xəbər verir ki, yarışı ikinci pillədə başa vuran komanda kubok və diplomla təltif olunub.
"Neftçi" PFK-nın U-14 komandasının baş məşqçisi Araz Qulamov yarışla bağlı təəssüratlarını klubun rəsmi saytına bildirib: "Turnir çox yüksək səviyyədə keçdi. Gərgin mübarizənin şahidi olduq. Finaladək uğurla irəliləsək də, həlledici görüşdə "Əlincə" klubuna 2:1 hesabı ilə uduzduq. Lakin yeniyetmə futbolçuların təcrübələrini artırmaq baxımından bu cür turnirlərdə çıxış etmək çox əhəmiyyətlidir. Ümumiyyətlə, "Neftçi"də uşaq futboluna böyük diqqət var. Bizə hər cür şərait yaratdığına görə klub rəhbərliyinə minnətdarlığımı bildirirəm".
