5 yanvar 2012 11:36
Sumqayıt Pamuku transfer etdi, Jetısu ilə oyunu gözləyir
“Sumqayıt” bu gündən etibarən Premyer Liqanın ikinci dövrəsi üçün hazırlıqlara start verir. Azerisport.az xəbər verir ki, ilk məşq saat 13:00-da Olimpiya Yığmalarının Təlim-Məşq bazasında keçiriləcək.
“Sumqayıt”ın “Neftçi”dən mövsümün sonuna qədər icarəyə götürdüyü yeni transferi Tərlan Quliyevdən başqa, “TUS Dornberq”dən transfer olunan 22 yaşlı Azərbaycan əsilli yarımmüdafiəçi Uğur Pamukun da məşqdə iştirak edəcəyi bildirilir.
Qeyd edək ki, “Sumqayıt” klubunun hazırlıq mərhələsi iki hissədən ibarət olacaq. Birinci hissədəki toplanış yanvarın 5-dən 15-dək Bakıda baş tutacaq. Hazırlıq mərhələsinin ikinci hissəsi isə Türkiyənin Antalya şəhərində olacaq. Belek bölgəsinin “Limak Arkadia” mehmanxanasında məskunlaşacaq Sumqayıt təmsilçisi yanvarın 16-dan 30-dək qonşu ölkədə təlim-məşq toplanışı keçəcək. Bu dövr ərzində üç və ya dörd yoxlama oyunu keçirməyi planlaşdıran “Sumqayıt”ın Antalyada ilk rəqibi isə Qazaxıstan Premyer Liqasında ikinci pillədə qərarlaşan “Jetisu” olacaq.
