5 yanvar 2012 12:32
Aqil Məmmədov da karyerasını başa vurdu
“Sumqayıt” Futbol Klubunun və Azərbaycan millisinin sabiq yarımmüdafiəçisi Aqil Məmmədov futbolçu karyerasını rəsmən başa vurub. Azerisport.az xəbər verir ki, adıçəkilən futbolçu bundan sonra klubun 15 yaşadək futbolçulardan ibarət komandasında baş məşqçi kimi fəaliyyət göstərəcək.
Məmmədov bununla əlaqədar olaraq klubun rəsmi saytına fikirlərini bildirib: “Futbolçuya böyük futboldan ayrılmaq çox çətindi. Kövrəlmədim desəm, yalan olar. Hələ ötən ay bu qərarı vermişdim. Düşünürəm ki, özümü məşqçi kimi göstərə bilərəm. “Sumqayıt” böyük layihədi. Mən bu ailədən ayrılmıram. Bu gün klubun rəhbərliyi ilə görüşüm oldu. Onlar mənə müxtəlif variantlar təklif etdi. Mən isə aşağı yaş qruplarında çalışmaq istəyimi onlara bildirdim. Beləliklə, “Sumqayıt”ın 15 yaşadək futbolçulardan ibarət komandası mənə həvalə olundu. Bu işin öhdəsindən gələcəyimə inanıram”.
Nəzərinizə çatdıraq ki, "Sumqayıt"ın 15 yaşadək futbolçulardan ibarət komandasına rəhbərlik edən Vəfadar Quliyevin isə Futbol Akademiyasının digər yaş qrupunda çalışacağı gözlənilir.
